Det finst også ein bokmålsversjon av undervisningsopplegget.

Temaa i undervisningsopplegget er

  • innføring i teori om sannsynlegheit og store tals lov
  • praktiske øvingar i form av myntkast for å få ei intuitiv forståing av sannsynlegheit og store tals lov
  • bruk av offisiell statistikk om kjønnsfordeling ved fødsel og stortingsval for å utforske store tals lov

Opplegget er for elevar på 9. og 10. trinn og i vidaregåande skole. Det er tverrfagleg og kombinerer matematikk (statistikk), samfunnsfag og informasjonsteknologi (programmering).

Undervisningsopplegget legg vekt på å styrke kritisk tenking og bruk av statistiske metodar. Elevane arbeider med innsamla og simulerte data, bereknar sannsynlegheiter og reflekterer over forskjellen mellom observerte og teoretiske resultat. I dette opplegget bruker vi data og simuleringar for å tenke som ein statistikar – vi undersøker, samanliknar og trekker konklusjonar ut frå tal.

Strukturen i undervisningsopplegget er slik:

  • Delar med grøne bilete er fagstoff som de lærarar kan bruke i undervisninga eller ev. be elevane om å lese.
  • Delar med lilla bilete er oppgåver.
  • Delar med svarte bilete er refleksjonsdel, og også ein del med Kahoot.

De vel sjølvsagt sjølv kva delar av undervisningsopplegget de vil bruke. Men vi anbefaler at de går gjennom del 1 og 2 før de ev. startar med del 3.

Elevane kan også øve seg og få ei intuitiv forståing av temaa gjennom å løyse oppgåvene. Fasiten ligg på slutten av kvar oppgåve.

Dersom de har innspel på kva vi kan gjere betre i dette undervisningsopplegget, eller har andre tema de gjerne ser at SSB lagar opplegg om, så skriv til oss på skole@ssb.no.

Undervisningsopplegget bygger på eit arbeid av Svetlana Badina frå då ho var student ved praktisk pedagogisk utdanning ved Universitetet i Sørøst-Noreg med fagdidaktikk i matematikk/programmering i 2024/2025. Opplegget er tilarbeidd etterpå i Statistisk sentralbyrå.

  • kjenne til kva sannsynlegheit og store tals lov er i teorien og i statistikken
  • bruke desse omgrepa i praktiske analysar av statistikk
  • bruke digitale ressursar og programmering for å forstå sannsynlegheit og store tals lov òg i analysar av statistikk knytt til desse temaa

Undervisningsopplegget kan arbeidast med tverrfagleg, med vekt på matematikk (statistikk), informasjonsteknologi og samfunnsfag/-kunnskap.

Vi tek utgangspunkt i desse kompetansemåla i læreplanar for matematikk ((MAT01-05 og MAT04-02 på udir.no), samfunnsfag (SAF01-04 på udir.no) og samfunnskunnskap (SAK01-01 på udir.no), informasjonsteknologi (INF01‑03 på udir.no), teknologi og forskingslære (TNF01‑03 på udir.no, programmering (PRG01‑02 på udir.no) og i overordna del med tverrfaglege tema:

Matematikk 9. trinn

  • utforske og argumentere for korleis framstillingar av tal og data kan brukast for å fremme ulike synspunkt
  • berekne og vurdere sannsynlegheit i statistikk og spel
  • simulere utfall i tilfeldige forsøk og berekne sannsynlegheit for at noko skal inntreffe, ved å bruke programmering

Matematikk 10. trinn

  • modellere situasjonar knytt til reelle datasett, presentere resultata og argumentere for at modellane er gyldige
  • utforske matematiske eigenskapar og samanhengar ved å bruke programmering

Matematikk S1/S2

  • bruke digitale verktøy til å simulere og utforske utfall i stokastiske forsøk, og forstå omgrepet stokastiske variablar
  • forstå omgrepa forventningsverdi, varians og standardavvik, og bruke desse storleikane til å tolke stokastiske variablar
  • simulere utfall i, utforske og tolke ulike statistiske fordelingar, og gje eksempel på reelle anvendingar av desse fordelingane

Samfunnsfag 10. trinn

  • bruke samfunnsfaglege metodar og digitale ressursar i eigne undersøkingar, presentere funn ved bruk av digitale verktøy og drøfte kor gyldige og relevante funna er​
  • vurdere på kva måtar ulike kjelder gjev informasjon om eit samfunnsfagleg tema, og reflektere over korleis algoritmar, einsretta kjelder eller mangel på kjelder kan prege forståinga vår

Samfunnskunnskap fellesfag VG1/VG2

  • utforske og presentere dagsaktuelle tema eller debattar ved å bruke samfunnsfaglege metodar, kjelder og digitale ressursar, og argumentere for eigne og andre sine meningar og verdiar

Informasjonsteknologi (INF01‑03)

  • drøfte problemstillingar knytt til innhenting, bruk og misbruk av data
  • bruke algoritmisk tenking og programmering for å utforske ei problemstilling og presentere resultatet
  • bruke programmering til å innhente, analysere og presentere informasjon frå reelle datasett

Teknologi og forskingslære (TNF01‑03)

  • analysere datamateriale frå forsøk og reflektere over og teste om usikkerheita kan reduserast
  • bruke kvantitativ metode i forsøk og vurdere pålitelegheita til resultata

Programmering (PRG01‑02)

  • bruke fleire programmeringsspråk, blant dei minst eitt som er tekstbasert
  • bruke grunnleggande prinsipp i programmering, slik som variablar, lykkjer, vilkår og funksjonar, og reflektere over bruken av desse

Demokrati og medborgarskap (tverrfagleg tema)

  • utvikle kritisk tenking om statistikk i samfunnsdebatten

Meld deg på nyheitsbrev og få tips om relevant innhald på ssb.no.