Vi har no denne talrekka med 24 observerte verdiar av månadslønn:
| Månadslønn i 1000 kr | Frekvens |
| 31 | 1 |
| 32 | 4 |
| 35 | 2 |
| 37 | 2 |
| 38 | 2 |
| 40 | 1 |
| 43 | 4 |
| 44 | 1 |
| 48 | 2 |
| 52 | 3 |
| 72 | 2 |
| Sum | 24 |
Gjennomsnittet for dei 24 observerte verdiane er avrunda lik 43 (i tusen kr), eller 43 000 kroner. Kva blir standardavviket for dei 24 observerte verdiane av lønn?
Treng du ein repetisjon? Den finn du i boksen «Framgangsmåte».
Standardavviket reknar vi ut ved først å rekne ut avstanden frå kvar observasjonsverdi til gjennomsnittet (kvar verdi av månadslønn minus gjennomsnittleg månadslønn). Så multipliserer vi dette talet med seg sjølv, det vil seie talet opphøgd i andre potens. Til slutt multipliserer vi med frekvensen (kvar månadslønn minus gjennomsnittleg månadslønn multiplisert med frekvensen for månadslønn). Etterpå summerer vi desse tala, og så delar vi på summen av frekvensane. Talet vi no får, variansen, tek vi kvadratrota av, og så har vi standardavviket.
Vi veit at gjennomsnittet avrunda er lik 43. Sum frekvens blir 24. For kvar observerte verdi bereknar vi avstanden frå verdien til gjennomsnittet og multipliserer dette talet med seg sjølv. Deretter multiplisert med frekvensen. Så summerer vi alle desse tala og får 2 863 som sum. Denne summen deler vi på sum frekvens som er 24 og får avrunda talet 119,29 (varians). For å finne standardavviket tek vi kvadratrota av 119,29. Vi får no til slutt som svar at standardavviket er avrunda lik 10,92, eller 10 920 kroner ettersom tala i tabellen er oppgjevne i 1000 kroner.
