Nedgangen i talet på konkursopningar markerer ei klar avdemping etter eit høgt nivå gjennom det første halvåret i år.
– Etter ein markant auke i første halvår 2025 ser vi no ein tydeleg nedgang i tredje kvartal. Det er for tidleg å seia om dette markerer ei varig stabilisering, men utviklinga bryt med den aukande trenden vi så tidlegare i år, seier seksjonssjef, Erik Fjærli
Samanlikna med tredje kvartal 2024, då det vart registrert 939 konkursar, er nivået 3,0 prosent lågare. Det betyr at konkursaktiviteten no nærmar seg nivået i fjor, etter å ha lege mykje høgare i første og andre kvartal 2025.
Nedgang i både føretakskonkursar og konkursar i einskildpersonsføretak
Både føretakskonkursar ekskl. einskildpersonføretak og einskildpersonsføretak inkl. personlege konkursar gjekk tydeleg ned i tredje kvartal, samanlikna med kvartalet før.
Talet på føretakskonkursar fall frå 989 til 833, ein nedgang på 15,8 prosent, medan einskildpersonsføretak vart nær halvert, frå 155 til 78.
Byggje- og anleggsverksemd mest utsett
Byggje- og anleggsverksemd hadde som vanleg flest konkursar, men også her vart det ein tydeleg nedgang.
Det vart opna 224 konkursar i bransjen i tredje kvartal 2025, mot 336 i andre kvartal – ein reduksjon på 33 prosent.
Samanlikna med tredje kvartal 2024, då det vart registrert 267 konkursar, er nivået 16 prosent lågare.
Også varehandel, reparasjon av motorvogner og overnattings- og serveringsverksemd opplevde færre konkursar.
I varehandel vart det registrert 147 konkursar i tredje kvartal 2025, ned frå 177 i førre kvartal og 171 i same kvartal året før.
For overnattings- og serveringsverksemd vart det opne 96 konkursar, mot 101 i andre kvartal 2025 og 98 i tredje kvartal 2024.
Færre konkursar i dei fleste fylke
Talet på konkursopningar i alle næringar gjekk ned i dei fleste fylke gjennom 2025. Nedgangen var særleg tydeleg frå andre til tredje kvartal.
Oslo, som har ein stor føretakspopulasjon, hadde som vanleg flest konkursar, men talet fall frå 243 i andre kvartal til 167 i tredje – ein nedgang på 31 prosent. Samanlikna med tredje kvartal 2024, då det vart registrert 149 konkursar, er nivået likevel høgare.
Også Innlandet og Buskerud hadde markerte reduksjonar i tredje kvartal, frå høvesvis 69 til 43 og 72 til 41 konkursar. I Vestland vart det registrert 83 konkursar, mot 112 kvartalet før og 81 i tredje kvartal 2024.
