Kva skjer ifølgje den makroøkonomiske modellen KVARTS?
Svar på spørsmåla og repeter det du no har lært i del 2.
Publisert: 2. juni 2025
Kursen på norske kroner blir svekt. Kva skjer med BNP Fastlands-Noreg og inflasjon på kort sikt og kvifor?
Prisane aukar i andre land. Kva skjer med norske konjunkturar og kvifor?
Handelspartnarane våre har dårlegare tider. Er det bra eller dårleg for norsk økonomi? Forklar.
Rentene i Noreg går opp, mens rentene står stille internasjonalt. Forklar korleis det vil påverke norsk økonomi.
Kursen på norske kroner blir svekt. Kva skjer med BNP Fastlands-Noreg og inflasjon på kort sikt og kvifor? Då aukar prisveksten i Noreg gjennom auka prisar på importerte varer og tenester, og BNP Fastlands-Noreg går opp fordi eksportbedriftene og bedrifter i Noreg som konkurrerer med utanlandske bedrifter, får høgare aktivitet ved at prisane på deira produkt blir meir konkurransedyktige.
Prisane aukar i andre land. Kva skjer då med norske konjunkturar og kvifor? Auka internasjonale prisar gjev dyrare import og auka innanlandske prisar, altså inflasjon i Noreg. I tillegg vil eksporten auke, mens importen vil avta – det vil seie auka nettoeksport. Dette skjer fordi norske bedrifter har forbetra konkurranseevna si. Isolert sett gjev dette eit positivt bidrag til aktiviteten på fastlandet (målt ved BNP Fastlands-Noreg). Men den auka nettoeksporten blir motsvart av at privatpersonar sitt forbruk (konsum) i Noreg går ned, noko som isolert sett gjev eit negativt bidrag til fastlandsaktiviteten.
Handelspartnarane våre har dårlegare tider. Er det bra eller dårleg for norsk økonomi?Forklar. Dette er ikkje bra for Noreg. Når dei utanlandske kundane våre har dårlegare tider, vil dei etterspørje færre varer og tenester, også frå Noreg. Då søkk eksporten vår. Eksport utgjer omtrent 20 prosent av BNP Fastlands-Noreg.
Rentene i Noreg går opp, mens rentene står stille internasjonalt. Forklar korleis det vil påverke norsk økonomi. Ein auke i norske renter vil alt anna likt styrke kronekursen. Det vil gje lågare inflasjon fordi importprisane vil gå ned. Men det vil også senke aktiviteten i eksportbedriftene og i bedriftene i Noreg som konkurrerer med importerte produkt. Effekten på BNP Fastlands-Noreg vil vere negativ.
