Nye tal frå offentleg forvaltnings inntekter og utgifter syner ei stabil utvikling i inntekter og utgifter, med ein auke på 5-6 prosent for begge storleikane frå 2. kvartal 2024 til 2. kvartal 2025 akkumulert.
Stønader er størst
Stønader i kontantar er den største posten på utgiftssida i offentleg forvaltning og står for i underkant av 30 prosent av dei totale utgiftene. Om lag halvparten av stønadene er alderspensjonar, medan arbeidsrelaterte stønader står for i overkant av 20 prosent. Prosentvis er arbeidsløysestønader blant dei stønadene som aukar mest frå 2. kvartal 2024 til 2. kvartal 2025 akkumulert, med ein auke på 18 prosent. Sett i alt har stønadene per 2. kvartal 2025 hatt ein noko svakare auke enn dei førre åra.
Petroleumsinntekter gir overskot
Offentleg forvaltnings overskot ligg på 411 milliardar kroner per 2. kvartal 2025. Overskotet har akkumulert sett gått nedover dei føregåande to åra, medan dette har snudd til ein oppgang i 2025. Overskotet kan i hovudsak forklarast av petroleumsinntekter. Viss ein ser bort frå petroleumsinntektene er overskotet over tid rundt null.
