Generelt

ID-en til skjemaet i Altinn er RA-0462.

Skjemaet skal fyllast ut på kommunenivå av den øvste ansvarlege for samferdsel i den etaten eller seksjonen som har fått dette ansvaret. Den som fyller ut skjemaet, skal førast opp med namn.

Formålet med skjemaet er å hente inn opplysningar om kommunal tenesteproduksjon innanfor området kommunale vegar og gater. Andre opplysningar som er relevante for å belyse området, blir henta inn frå andre kjelder utanom KOSTRA sine innsamlingsrutinar. SSB nyttar mellom anna Nasjonal vegdatabank (NVDB) og Ladestasjondatabasen (NOBIL) til å hente inn opplysningar om vegnettet og ladeinfrastrukturen.

Det skal fyllast ut eitt skjema per kommune, men skjemaet kan sendast inn fleire gonger. Dersom kommunen får tilbakemelding om feil eller manglar i dei innrapporterte opplysningane, skal skjemaet rettast og sendast inn på nytt. Kommunenummer og kommunenamn er førehandsregistrerte i skjemaet. Namn, telefonnummer og e-postadresse til den som har fylt ut skjemaet, må førast opp.

Roller

Du som skal fylle ut og sende inn skjemaet, må ha fått tildelt riktig rolle i Altinn.

For å fylle ut og sende inn dette skjemaet må du ha enkeltrett til denne spesifikke skjematenesta. Ta kontakt med leiaren din dersom du ikkje har riktig rolle i Altinn.

Du kan lese meir om roller på sidene til Altinn.

Du kan òg ta kontakt med brukarservicen til Altinn på telefon 75 00 60 00 dersom du har spørsmål om roller og rettar.

Innleiande spørsmål (opplysningar om kommunen)

Kommunenummer og kommunenamn blir fylte ut automatisk ved innlogging. Namn og e-postadresse til den skjemaansvarlege, som tidlegare låg under denne delen, kjem no til slutt.

Private vegar med kommunalt tilskot

Med private vegar meiner vi vegar og gater som er eigde, drifta og haldne ved like av private aktørar, utan kommunalt, fylkeskommunalt eller statleg drifts- og vedlikehaldsansvar. Vegstrekningane må vere fysisk tilrettelagde for køyring med personbil. Private vegar kan vere opne eller stengde for allmenn ferdsel. Skogsbilvegar, gang- og sykkelvegar, fortau, turvegar og andre areal som ikkje er berekna for bilkøyring, skal ikkje reknast som private vegar i denne samanhengen.

2.1.1. På spørsmål om kommunen har gitt tilskot til private vegar i rapporteringsåret, skal det opplysast om kommunen har gitt slike tilskot i løpet av året.

2.1. Ved rapportering av dei samla tilskota frå kommunen til private vegar i rapporteringsåret skal faste/årlege tilskot og eingongstilskot utbetalte i rapporteringsåret takast med. Skogsbilvegar og vedlikehaldskostnader som kommunen sjølv står for, skal ikkje takast med. Beløpet skal oppgivast i heile kroner utan meirverdiavgift.

2.2. Ved rapportering av kor mange kilometer private vegar kommunen gav tilskot til i rapporteringsåret, skal vegar som har motteke faste/årlege tilskot eller eingongstilskot utbetalte i rapporteringsåret takast med. Skogsbilvegar skal ikkje takast med.

Belysning langs kommunale vegar og gater

Med kommunale vegar og gater meiner vi vegar og gater som kommunen har drifts- og vedlikehaldsansvar for, og som er fysisk tilrettelagde for ordinær køyring med personbil. Gang- og sykkelvegar, fortau, turvegar og andre areal som ikkje er berekna for bilkøyring, skal ikkje takast med.

2.3. Ved rapportering av brutto driftsutgifter til gatebelysning langs kommunale vegar og gater i rapporteringsåret skal følgjande takast med:

  • legging av kablar, oppsetting av master og armaturar, inkludert materiell
  • rehabilitering og utskifting, medrekna utskifting av eksisterande luftstrekk til jordkablar, utskifting av master og armaturar, inkludert materiell, og utbetring av skadar valda av trafikantar
  • vedlikehald i samsvar med avtale med energiverk, medrekna løpande vedlikehald som til dømes utskifting av enkeltlamper, sikringar, tidsur og fotocelle
  • nettleige, det vil seie avtale med netteigar om å føre kraft frå produsent til gatelys, og kraft, det vil seie kjøp av straum frå leverandør
  • støtte, tilskot og refusjonar som kommunen heilt eller delvis gir til velforeiningar eller andre, og utgifter til gatebelysning som er forskotterte av andre enn kommunen

Beløpet skal oppgivast i heile kroner utan meirverdiavgift.

2.4. Ved rapportering av totalt tal på kilometer kommunale vegar og gater med gatelys som er køyrbare med personbil skal den samla lengda av slike vegar og gater oppgivast. Dersom talet på kilometer ikkje er tilgjengeleg, kan det anslåast, til dømes basert på talet på lyspunkt og gjennomsnittleg avstand mellom lyspunkta.

2.5. Ved rapportering av totalt tal på lyspunkt langs kommunale vegar og gater skal også tilfelle der ansvaret for vedlikehald m.m. av enkelte strekningar er sett bort til velforeiningar eller andre, takast med.

Kommunale vegar tilrettelagde for syklande og vegar med fast dekke

2.6. Ved rapportering av kor mange kilometer veg tilrettelagd for syklande kommunen har ansvar for, skal følgjande takast med:

  • sykkelvegar og kombinerte gang- og sykkelvegar
  • eigne sykkelfelt. Tosidige sykkelfelt skal rapporterast som 1 × veglengda
  • tiltak i gater med skilta fartsgrense 30 km/t eller 40 km/t som inngår i eit sykkelvegnett

Fortau langs kommunal veg skal ikkje takast med.

2.7. Ved rapportering av talet på kilometer kommunale vegar og gater med fast dekke skal vegar som har dekke av bundne materiale, takast med. Dette omfattar mellom anna asfalt, betong eller brustein, og knust stein som er bunden saman med eit bituminøst bindemiddel (emulsjonsgrus). Vegar som har ubundne dekke, som til dømes grus eller laus stein, skal ikkje takast med.

Nye og oppgraderte kommunale vegar og gater

For rapportering av nye og oppgraderte kommunale vegar og gater, og vegar som har fått nytt fast dekke, skal det berre rapporterast kilometer det året strekninga er ferdig tilrettelagd, overteken av kommunen og opna for trafikk. Det blir skilt mellom:

  • nye kommunale vegar og gater, som er heilt nye strekningar
  • eksisterande kommunale vegar og gater som har fått nytt fast dekke, det vil seie heile strekningar som har fått nytt asfalt-, betong- eller brusteinsdekke, inkludert dekke der knust stein er bunden med bituminøst bindemiddel
  • eksisterande kommunale vegar og gater som er oppgraderte, det vil seie tiltak som inneber ei standardheving og/eller funksjonsforbetring av ein eksisterande veg eller ei gate, utover berre legging av nytt fast dekke

For anlegg for syklande skal alle tiltak rapporterast under eitt.

2.8.a. Ved rapportering av kor mange kilometer heilt nye kommunale vegar og gater som blei opna for trafikk i rapporteringsåret, skal nye kommunale vegar og gater som blei opna etter gjennomføring av investeringstiltak i kommunal regi eller i regi av andre, takast med. Omklassifisering av eksisterande veg skal ikkje takast med.

2.8.b. Ved rapportering av kor mange kilometer eksisterande kommunale vegar og gater som blei oppgraderte i rapporteringsåret, meiner vi at den eksisterande vegen har fått ei standardheving og forbetra funksjon utover ordinært vedlikehald. Standardheving omfattar forbetring av eksisterande veg, og tiltaka skal bidra til at vegen får betre funksjon. Døme på standardheving er:

  • breiddeutviding
  • utretting av kurver
  • heving av bereevne
  • ombygging av vegkryss

Dersom eit standardhevande tiltak også omfattar legging av nytt fast dekke, skal vegstrekninga rapporterast. Legging av nytt fast dekke åleine, utan anna standardheving eller funksjonsforbetring, skal ikkje takast med. Nybygg eller større kapasitetsutvidingar skal heller ikkje takast med.

2.8.c. Ved rapportering av kor mange kilometer eksisterande kommunale vegar og gater som fekk nytt fast dekke i rapporteringsåret, meiner vi vegstrekningar som har fått nytt asfalt-, betong- eller brusteinsdekke, inkludert dekke der knust stein er bunden med bituminøst bindemiddel.

Talet på kilometer med nytt fast dekke skal bereknast som summen av lengda på dei strekningane som har fått nytt fast dekke, målt frå startpunkt til sluttpunkt. Det er lengda på strekninga som skal rapporterast, uavhengig av talet på køyrefelt, vegbreidde eller mengda dekke som er lagt. Dekkelegging av nye kommunale vegar og gater og punktvis dekkelegging eller lapping skal ikkje takast med.

2.8.d. Ved rapportering av kor mange kilometer ny kommunal veg tilrettelagd for syklande kommunen oppretta i rapporteringsåret, skal følgjande takast med:

  • sykkelvegar, kombinerte gang- og sykkelvegar og eigne sykkelfelt. Tosidige sykkelfelt skal rapporterast som 1 × veglengda
  • tiltak i gater med skilta fartsgrense 30 km/t eller 40 km/t som inngår i eit sykkelvegnett

Fortau langs kommunal veg skal ikkje takast med.

Haldeplassar for buss langs kommunal veg

Rapporteringa av haldeplassar er endra samanlikna med tidlegare år. Tidlegare blei det spurt om kor mange haldeplassar som var oppgraderte eller ombygde til universell utforming i løpet av rapporteringsåret. Det skal no i staden rapporterast totalt tal på haldeplassar for buss langs kommunal veg som oppfyller alle minimumskriteria for universell utforming.

Rapporteringa gjeld behaldninga av haldeplassar som oppfyller alle minimumskriteria for universell utforming, og ikkje berre haldeplassar som er oppgraderte eller ombygde i rapporteringsåret.

2.9. Ved rapportering av kor mange haldeplassar for buss langs kommunal veg som oppfyller alle minimumskriterium for universell utforming, skal berre haldeplassar der alle kriteria er oppfylte, teljast med. Med haldeplass for buss meiner vi ein fysisk tilrettelagd stoppestad for av- og påstiging av buss.

Med minimumskriterium for universell utforming meiner vi at haldeplassen har:

  • haldeplasskilt
  • sitjemoglegheit
  • belysning
  • plattformbreidde på minst 2 meter
  • kantstein for påstiging (16–18 cm)
  • moglegheit for at buss kan stoppe heilt inntil kantstein
  • taktil indikator ved påstigingspunkt

Kvar haldeplass skal teljast per stoppestad per retning.

Offentleg regulerte biloppstillingsplassar

2.10.a. Ved rapportering av talet på offentleg regulerte biloppstillingsplassar i alt i kommunen skal alle offentleg regulerte biloppstillingsplassar, både avgiftslagde og ikkje-avgiftslagde, takast med.

Offentleg regulerte biloppstillingsplassar, både oppmerkte og ikkje-oppmerkte, ved barnehagar, skular, kyrkjer, idrettsanlegg, institusjonar og liknande skal også takast med. For uoppmerkte parkeringsareal skal talet på biloppstillingsplassar bereknast ut frå at kvar plass krev 2,5 m × 5 m. Innfartsparkeringsplassar skal ikkje takast med. Det same gjeld biloppstillingsplassar anlagde for privat næring eller arbeidsplassar som ikkje er offentleg regulerte.

2.10.b. Ved rapportering av kor mange av dei offentleg regulerte biloppstillingsplassane som er avgiftslagde, skal talet på avgiftslagde plassar som inngår i det totale talet på offentleg regulerte biloppstillingsplassar, oppgivast.

2.11. Ved rapportering av talet på offentleg regulerte biloppstillingsplassar for personar med forflyttingsnedsetjing skal det oppgivast kor mange slike plassar kommunen har ansvaret for.

2.12. Ved rapportering av totalt tal på gyldige parkeringsløyve for personar med forflyttingsnedsetjing som er utferda i kommunen per 31.12. i rapporteringsåret, skal alle gyldige løyve takast med, uavhengig av kva år dei er utferda. Dersom kommunen berre har oversikt over løyve utferda siste år, må det totale talet på gyldige løyve i kommunen bereknast.