«Mana iskkadeapmái»

Du vástádusat leat deaŧalaččat

Mii dárbbašit vástádusa dus vai sáhttit almmuhit luohtehahtti statistihka sámediggeválggaid birra. Leaččat dál jienastan, dahje it, ja beroškeahttá das man olu don beroštat politihkas, de leat du vástádusat deaŧalaččat dasa ahte sáhttit addit nu rievttes gova go vejolaš sis  geat leat mielde Sámedikki jienastuslogus.

Bohtosat adnojuvvojit almmolaš statistihkain ja dutkamis. Sámediggi lea ruhtadan iskkadeami, mii lea 2009 rájes čađahuvvon buot sámediggeválggaid maŋŋel.

Mii jearrat

• politihkalaš beroštumi
• luohttámuša
• leat go don jienastan sámediggeválggas
• bellodaga válljema
• mainna lágiin leat dieđuid ožžon válggaid birra
• du oainnuid iešguđet sámepolitihkalaš áššiin

Ádjána birrasiid 15 minuhta vástidit iskkadeami, muhtimat guhkit ja earát fas oanehit áiggi.

Sámedikki jienastuslogus leat 6 000 olbmo soaittáhagaid mielde gessojuvvon searvat iskkadeapmái. Muhtimat sis ledje maiddái 2021:s gessojuvvon seammalágán iskkadeapmái searvat.

Jus don leat gessojuvvon searvat iskkadeapmái, de bovdejuvvot vástidit elektrovnnalaš jearahallanskovi. Don leat ožžon reivve Altinn, dahje poastta bokte, ja dasa lassin lea SSB sádden SMS. Reivves lea liŋka skovvái man galggat deavdit.

Sáhtát maid deaddilit «Mana iskkadeapmái » dán siiddu bajágeahčen go áiggut vástidit. Geavaheaddje-ID gávnnat reivves man leat ožžon Altinn dahje poastta bokte.

Sáhtát ieš válljet vástidat go iskkadeami dárogillii, julevsámegillii, davvisámegillii vai lullisámegilli.

  • Vástádusat adnojuvvojit dušše statistihka ráhkadit, ja mii eat goassege almmut ovttaskas vástádusaid.
  • Lea eaktodáhtolaš searvat iskkadeapmái. Du vástádusat adnojuvvojit ráhkadit buoret statistihka sámi demokratiija birra.
  • Don sáhtát gitta 31.12.2025 rádjái geassádit ja sihtat iežat vástádusaid sihkkojuvvot. Dan sáhtát dahkat telefovnna dahje e-poastta bokte.
  • Vai iskkadeapmi sáhttá jođáneamos lági mielde čađahuvvot, viežžat mii dieđuid du birra registariin gos SSB beassá dieđuid viežžat. Earret Álbmotregistara dieđuid, leat dat vel dieđut oahpuid birra maid SSB oažžu jahkásaččat skuvllain, fylkkain ja Oahppoloatnakássas, dieđut barggu, sisaboađu, opmodaga, oajuid ja doarjagiid birra maid viežžat Vearrodoaimmahagas ja Nav:s, ja dieđut válgasearvama birra suohkana jienastuslogus. Mii maiddái čatnat dása dieđuid du bearašgotti sisaboađuid birra. Jus don servet Sámediggeválgaiskkadeapmái 2021:s, de mii čatnat du vástádusaid oktii dainna maid 2021:s vástidit.
  • Maŋŋel go dieđuid čohkken lea loahpahuvvon, de sihkkojuvvojit buot namat, čujuhusat ja riegádannummarat diehtočoakkáldagas. Riegádannummara sadjái boahtá kodanummar. Danne go mii háliidit duinna fas váldit oktavuođa maŋŋel, de vurkkodit mii du riegádannummara, muhto dat lea oalát sirrejuvvon du vástádusain. ISF oažžu dušše fiilla mas lea du kodanummar ja anonyma bohtosat. 30.06.2030 rádjái sihkkojuvvo maid kodanummar ja riegádannummar. Jus don servet 2021 Sámediggeválgaiskkadeapmái, de kodanummar sihkkojuvvo ovdal 2026. ISF oažžu dušše anonyma bohtosiid. Goabbá áigemearri dutnje guoská, boahtá ovdan bovdehusreivves man don leat ožžon Altinn dahje poastta bokte.
  • Iskkadeapmi čađahuvvo statistihkkalága ja persovdnadieđuidlága mielde. Jus dus leat jearaldagat persovdnasuodjaleami birra, de sáhtát čállit e-poastta deike personvernombud@ssb.no dahje lohkat eambbo min neahttasiidduin persovdnasuodjaleami birra.

Leat go dus eambbo jearaldagat?

Jus it gávnna vástádusa iežat jearaldagaide, de sáhtát minguin váldit oktavuođa e-poastta dahje telefovnna bokte. Geahča gulahallandieđuid dán siiddu vuolágeahčen.