Skatterekneskap, april 2013

Ved utgangen av april hadde det kome inn 84,1 milliardar kroner i oljeskattar. 31,4 milliardar kroner kom frå ordinær skatt på olje og 52,7 milliardar frå særskatt. Ordinær skatt på petroleumsinntekter og særskatt voks med høvesvis 13,3 og 16,1 prosent frå i fjor. Samanlikna med same perioden i fjor auka skatteinntektene frå petroleumsverksemda med 15,1 prosent, eller 11 milliardar kroner. Det har vore store svingingar i skatteinnbetalingane frå petroleumsverksemda dei fire fyrste månadene. Til dømes blei det for februar rapportert ein reduksjon på 3,4 prosent, eller 1,2 milliardar kroner. Dei store svingingane kjem av endringar i terminskatten for 2012. Selskapa kan søke om endring i fastsett terminskatt med verknad for 4. – 6. termin. Samanlikna med terminskatten for 2011 er terminskatten for 2012 sett ned med om lag 0,65 milliardar kroner meir per termin. Sett under eitt vil terminskatten for 4. – 6. termin vere lågare enn i fjor. På grunn av høg innbetaling 5. termin, altså no i april, blir det venta låg innbetaling 6. termin, i juni. Svingingane har si årsak i endra betalingsmønster.

5,2 prosent mindre frå dei upersonlege skattytarane eksklusiv petroleumsverksemda

Dei personlege skattytarane auka sine skatteinnbetalingar med 6,9 prosent frå i fjor. Totalt har desse bidrege med 178,8 milliardar kroner til dei ulike skattekreditorane. Dei upersonlege skattytarane eksklusiv petroleumsverksemda har bidrege med 53,8 milliardar kroner hittil i år, ein nedgang på 5,2 prosent frå 2012. Fellesskatt til staten blei redusert med 4,1 prosent, eller om lag 2,1 milliardar kroner, blant dei upersonlege skattytarane. Staten har totalt motteke 102,1 milliardar kroner hittil i år frå dei personlege og dei upersonlege skattytarane. Dette er berre 132 millionar kroner, eller 0,1 prosent, meir enn i april i fjor.