Framleis markert nedgang i industriproduksjonen

Indeksnivået for industriproduksjonen var på 113,1 (2005=100) i perioden mars-mai 2020 mot 119,3 i føregåande tremånedersperiode. Figur 1 visar at dei sesongjusterte tala har hatt ei relativt stabil utvikling det siste året, før produksjonen fall kraftig frå og med mars 2020.

Grunna behandlinga av mars og følgjande månader som ekstremverdiar er ikkje trendutviklinga etter dette representativ for faktisk utvikling. Trenden har difor blitt tatt ut frå figur 1 for dei seinaste månadene. For meir informasjon, sjå informasjonsboksen om koronaviruset i slutten av artikkelen.

Månadsendring: Kraftig nedgang i eksportretta industri i mai

Sesongjusterte tal viser at industriproduksjonen fall med heile 3 prosent frå april til mai 2020. Dette fallet kjem etter ei nedgang på 1,6 prosent frå mars til april. I  mai var det særleg eksportretta industri som opplevde stor nedgang. Næringsgruppa oljeraffinering, kjemisk og farmasøytisk industri bidrog klart mest til den samla nedgangen i industrien med eit fall på heile 14 prosent. Nedgangen skuldast hovudsakleg låg produksjon av farmasøytiske produkta grunna redusert global etterspurnad som følgje av Covid 19-spreiinga. I tillegg fall òg produksjonen innanfor ikkje-jarnhaldige metall. Nedgangen i næringa kan mellom anna knytast til låg europeisk bilproduksjon.

På den motsette sida, var det teikn til betring innanfor næringsgruppa møbelindustri og annan industri, og i bygging av skip og oljeplattformer. Førstnemnde opplevde en kraftig auke på heile 29,5 prosent, medan sistnemnde gjekk opp  med 4,7 prosent. Auken kan sjåast i samanheng med mindre strengje smittevernsreglar.

Tremånadsendring: historisk fall i industriproduksjonen

Sesongjusterte tal viser at industriproduksjonen gjekk ned med så mykje som 5,2 prosent i perioden mars- mai 2020 samanlikna med førre tremånadersperiode. Det er ikkje målt større fall i ein tremånadersperiode for industriproduksjonen i denne tidsserien som går tilbake til 1990. Det bratte fallet må sjåast i samanheng med at alle tre månadene i denne perioden har vore sterkt prega av Koronasituasjonen. Bygging av skip og oljeplattformer bidrog klart mest til nedgangen i denne perioden med eit fall på heile 30 prosent.

På den andre sida, bidrog næringsmiddelindustrien til å dempe den samla nedgangen i industrien med ein solid produksjonsauke i perioden. Veksten heng saman med høg etterspurnad frå den norske daglegvarebransjen. For meir info, sjå artikkel om auke i daglegvarehandelen.

Månadsendring: kraftig fall i Eurosona i april 2020

Estimerte tal frå Eurostat, statistikkontoret i EU, viser at den samla industriproduksjonen i land i eurosona fall med over 18 prosent frå mars til april 2020. Denne kraftige nedgangen skyldast dei ulike tiltaka som vart sette i verk for å hindre spreiinga av koronaviruset. Det var produksjon av varige konsumvarer, som til dømes bilar, som hadde størst nedgang, etterfult av produksjon av investeringsvarar. Fleire store europeiske industrinasjonar som Tyskland, Frankrike og Italia opplevde alle eit produksjonsfall i april på over 20 prosent.

I den same perioden hadde industriproduksjonen i Noreg ein nedgang på 1,6 prosent. Sverige hadde  ein kraftig nedgang på heile 17 prosent, medan  Danmark hadde eit fall på 4,5 prosent.  

For meir informasjon om utviklinga i europeisk industriproduksjon i april, sjå denne artikkelen frå Eurostat.

Tremånadersendring: vekst i oljeproduksjonen og kraftforsyning

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein oppgang på 1,4 prosent i perioden mars-mai 2020 samanlikna med førre tremånadersperiode, viser sesongjusterte tal. Utvinning av råolje hadde ein klår oppgang på 9,5 prosent, medan utvinning av naturgass gjekk ned 2,4 prosent. Olje- og gassproduksjonen blei ikkje nemneverdig råka av koronautbrotet i perioden mars- mai 2020. Veksten i denne perioden kan mellom anna knytast til produksjonsstart ved eit nytt oljefelt på hausten 2019.  For fleire detaljar om olje- og gassproduksjonen i denne tremånadersperioden, sjå pressemelding frå Oljedirektoratet.

Utvinningstenester opplevde ein kraftig nedgang på heile 13 prosent i perioden mars- mai 2020 samanlikna med førre tremånadersperiode. Strengje smittevernsreglar saman med den låge oljeprisen og reduserte leteinvesteringar på norsk sokkel forklarer nedgangen.

Bergverksdrift hadde ein oppgang på 6 prosent i same periode, medan det for norsk kraftforsyning var ein vekst på over 24 prosent. Den høge kraftproduksjonen skuldast mellom anna  eit behov for å gjera plass til mykje vanntilsig i magasina når snøsmeltinga startar for fullt.