Arbeidskraftundersøkinga, sesongjusterte månadsvise tal, februar 2013

Arbeidskraftundersøkinga (AKU) viser at det var 95 000 arbeidslause personar i februar 2013 (gjennomsnitt for perioden januar-mars), justert for sesongvariasjonar. Dette er om lag det same som i november 2012 (gjennomsnitt av oktober-desember).

Stabil sysselsetting

Dei sesongjusterte tala frå AKU viser at sysselsettinga gjekk opp med 7 000 personar frå november 2012 til februar 2013, noko som er innanfor feilmarginen i AKU. Sidan juni 2012 har talet på sysselsette berre vist variasjonar som er innanfor feilmarginen. Dette representerer eit brot med ein om lag to år lang auke i talet på sysselsette før den tida. Dei sysselsette i prosent av befolkninga i aldersgruppa 15-74 år var 68,8 prosent i februar, uendra frå november.

Framleis auke i arbeidsløysa i EU15-området

I EU15 gjekk arbeidsløysa opp frå 10,9 prosent i november til 11,1 prosent i februar. Medan dei arbeidslause i Tyskland utgjorde 5,4 prosent av arbeidsstyrken i både november og februar, auka arbeidsløysa med 0,3 prosentpoeng, til 10,8 prosent, i Frankrike. I USA gjekk arbeidsløysa ned med 0,1 prosentpoeng i løpet av same perioden, til 7,7 prosent i februar. I Danmark gjekk arbeidsløysa opp frå 7,3 prosent i november til 7,4 prosent i februar. Derimot gjekk arbeidsløysa ned med 0,2 prosentpoeng til 8,2 prosent i Sverige i same perioden. Alle dei internasjonale tala er sesongjusterte og henta frå statistikkontoret i EU, Eurostat.