Kulturtilbod, 2013

Kultur-KOSTRA omfattar utgifter til kulturformål i kommunane og fylkeskommunane. Frå 2012 til 2013 har både kommunane og fylka hatt ein auke i netto driftsutgifter. Fylkeskommunane har brukt den same delen av dei totale netto driftsutgiftene til kultur dei tre siste åra. I kommunane er derimot delen av driftsutgiftene som går til kultur, redusert i den same perioden. Fylkeskommunane nytta 1,3 milliardar kroner av netto driftsutgifter til kulturformål i 2013. I kommunane gjekk til saman 9,8 milliardar kroner til kultur.

Hos fylkeskommunane gjekk 1,6 prosent til kulturformål

Fylkeskommunane brukte 1,6 prosent av dei totale netto driftsutgiftene på kultur i 2013. Det er den same delen som er løyva kvart år sidan 2011. I gjennomsnitt brukte fylkeskommunane 260 kroner per innbyggjar til kulturformål i 2013. Museum og kunstformidling er dei to områda som står for den største delen av utgiftene, med respektive 28,2 og 27,3 prosent.

Kommunane brukte 3,7 prosent på kultur

Kommunane brukte i gjennomsnitt 3,7 prosent av dei totale netto driftsutgiftene til kulturformål i 2013. Det er 0,1 prosentpoeng mindre enn året før. I gjennomsnitt brukte kommunane 1 921 kroner per innbyggjar til kulturformål i 2013. Dette er ein auke på drygt 62 kroner frå 2012, og 130 kroner meir enn i 2011. Idretten var den største kulturposten med 3,1 milliardar kroner, noko som utgjer 31,4 prosent av pengane til kulturformål totalt.