Produksjonsindeks for olje og gass, industri, bergverk og kraftforsyning, juli 2014

Produksjonen i industrien var rekordhøg i perioden mai til og med juli 2014, og indeksnivået var på 123,9 (2005=100), mot 122,2 i tremånadersperioden før.

Tremånadsendring: Stor aktivitet i maskinindustri og bygging av oljeplattformer

Det var mellom anna ein auke i produksjonen i næringar som maskinindustri og bygging av skip og oljeplattformer frå mai til og med juli 2014, samanlikna med tremånadersperioden før, viser sesongjusterte tal . Desse næringane har fortsatt ein sterk vekst og har sidan 2005 hatt ein oppgang på høvesvis 120 og 119 prosent. Innanfor bygging av skip og oljeplattformer er det høge aktivitetsnivået særleg knytta til oljeplattformer og moduler. Det var vidare ein auke i næringsmiddelindustrien som særleg heng saman med ein høg produksjon av fisk og fiskevarer. Dette kan knytast til ein høg internasjonal etterspurnad etter laks.

Det var samstundes ein mindre nedgang for gummi, plast og mineralsk industri i tillegg til i metallindustrien frå mai til og med juli 2014, samanlikna med tremånadersperioden før.

Månadsendring: Tilnærma uendra industriproduksjonen frå juni til juli 2014

Det var vekst innanfor oljeraffinering, kjemisk og farmasøytisk industri samla sett i perioden juni til juli 2014, viser sesongjusterte månadstal. Veksten kom trass i ein nedgang i produksjonen av kjemiske råvarer. Det var òg produksjonsauke i maskinindustri og bygging av skip og oljeplattformer i denne perioden. På den andre sida var det ein nedgang samla sett for næringsmiddel- og drikkevareindustri, noko som kan knytast til eit fall i produksjonen av drikkevarer.

Tolvmånadsendring: Sterkare vekst i Noreg enn i eurosona i juni 2014

Norsk industriproduksjon gjekk opp med 3,2 prosent frå juni 2013 til juni 2014, viser kalenderjusterte tal . Maskinindustrien medverka saman med næringsmiddel- og drikkevareindustrien særskild til oppgangen i juni. Estimerte tal frå Eurostat, statistikkontoret i EU, viser at industriproduksjonen i land i eurosona gjekk opp med 0,4 prosent i den same perioden.

Tremånadsendring: Produksjonsindeksen samla (PII) gjekk ned

Produksjonsindeksen for olje- og gassutvinning, industri, bergverksdrift og kraftforsyning samla (PII) gjekk ned med 2,3 prosent frå mai til og med juli 2014, samanlikna med perioden før, viser sesongjusterte tal. Utvinninga av råolje gjekk ned med 6,2 prosent, medan produksjonen av naturgass fall med 5,2 prosent. Frå juni til juli 2014 gjekk utvinninga av råolje opp 0,8 prosent, medan produksjonen av naturgass gjekk ned med 0,8 prosent, viser sesongjusterte tal. Det var redusert produksjon på nokre felt på norsk kontinentalsokkel på grunn av tekniske problem i juli 2014 ifølgje opplysningar frå Oljedirektoratet .

Produksjonen i norsk kraftforsyning gjekk opp med 6,2 prosent frå mai til og med juli 2014, samanlikna med tremånedersperioden før, viser sesongjusterte tal.