Arbeidskraftundersøkinga, sesongjusterte tal, april 2004

Det siste talet på arbeidslause for april (tremånadersperioden mars-mai) syner ein auke på 2 000 personar frå månaden før (februar-april). Den avtakande trenden vi har hatt for arbeidsløysa sidan juni (mai-juli) i fjor, har med dette svekka seg noko, men endringa er klårt innanfor feilmarginen i AKU. Sesongjusterte tal for registrerte arbeidslause ved arbeidskontora viste om lag same utvikling frå mars til april.

I juni 2003 byrja talet på sysselsette å auka etter ein lengre periode med nedgang. I april i år var talet uendra frå månaden før. Sysselsetjinga ser likevel ut til å vera inne i ein aukande trend.

Stadig høgare arbeidsløyse i Tyskland

Den sesongjusterte arbeidsløysa i Noreg var 4,3 prosent i april 2004, samanlikna med 4,4 prosent i januar. I same tidsrom var arbeidsløysa i EU- og OECD-landa om lag uendra på respektive 8,1 og 6,9 prosent. I USA var arbeidsløysa 5,6 prosent i april, det same som i januar. Arbeidsløysa i Sverige auka frå 6,0 til 6,3 prosent, og i Finland frå 9,0 til 9,1 prosent. I same periode var det ein auke frå 9,6 til 9,8 prosent i Tyskland, medan Frankrike hadde ein nedgang frå 9,5 til 9,4 prosent. Dette syner tal frå OECD og Eurostat .

Vekst i vekeverkstala

Utførte vekeverk (à 37,5 timer) har vist ein fallande tendens sidan sommaren 1998. Men frå januar til april auka talet på utførte vekeverk med 39 000, noko som er klårt utanfor feilmarginen. Auken må likevel sjåast i samanheng med at ekstra mange sysselsette tok fri i arbeidsdagane rundt nyttår, noko som gjorde at talet for januar (tremånadersperioden desember-februar) var uvanleg lågt.

Uvisse ved dei sesongjusterte tala

Føremålet med å justera for sesongvariasjon, er å beskriva utviklinga gjennom året og gje tal på endringar for den siste tremånadersperioden som er reinsa for normale sesongsvingingar. Kvalitetstestar syner at dei sesongjusterte tala for AKU-arbeidsløysa er usikre. Sesongjusteringsmetoden har vanskar med å identifisera eit stabilt sesongmønster i denne talserien. Dei tilfeldige utslaga er relativt store i forhold til sesongkomponenten. I tillegg er det relativt få arbeidslause i utvalet, slik at uvissa blir stor. Dette gjer at tala må tolkast med varsemd. For å redusere utvalsuvissa, er dei publiserte AKU-tala tremånaders glidande gjennomsnitt av dei sesongjusterte tala. Til dømes er talet for april gjennomsnittet av overslaga for mars, april og mai.

Tabeller:

• Tabell 1. Sysselsetjing og arbeidsløyse for personar 16-74 år. Sesongjusterte tal, tremånadars glidande gjennomsnitt. Absolutte tal i 1000 og arbeidslause i prosent av arbeidsstyrken.