Arbeidskraftundersøkinga, sesongjusterte tal, oktober 2003

Talet på arbeidslause gjekk ned med 1 000 personar frå tremånadsperioden juni-august til september-november 2003. Endringa er likevel innanfor feilmarginen til desse endringstala i AKU. I prosent av arbeidsstyrken gjekk AKU-arbeidsløysa ned med 0,1 prosentpoeng. Talet på registrerte arbeidslause ved arbeidskontora viste ein svak auke i den same perioden.

Etter ein periode med kraftig vekst i talet på sysselsette personar fram til og med 1999, minka veksten monaleg, og gjennom 2002 byrja sysselsetjinga å falle. I alle tremånadsperiodane frå april-juni til september-november 2003 har talet på sysselsette auka. Samla har dette gjeve ein oppgang på 19 000 personar, noko som er utanfor feilmarginen til desse endringstala i AKU.

Auka arbeidsløyse i Sverige og Danmark

Den sesongjusterte arbeidsløysa i Noreg var 4,5 prosent i oktober 2003. I juli same året var talet 4,6 prosent. I same tidsrom var arbeidsløysa i EU-landa uendra på 8,0 prosent, medan for OECD-landa samla gjekk arbeidsløysa ned frå 7,2 til 7,1 prosent. I USA var arbeidsløysa 6,0 prosent i oktober, ein nedgang på 0,2 prosentpoeng frå juli. Arbeidsløysa i Sverige auka frå 5,5 til 5,8 prosent, i Danmark frå 5,7 til 6,0 prosent, medan ho i Finland gjekk ned frå 9,1 til 8,9 prosent. I same periode var arbeidsløysa i Tyskland uendra, medan ho i Frankrike gjekk noko opp. Dette syner tal frå OECD og EUROSTAT .

Ingen nedgang i vekeverkstala

Utførde vekeverk (à 37,5 timer) har vist ein fallande tendens frå hausten 1999. Siste tremånadsperiode auka talet på utførde vekeverk med 8 000, noko som likevel er innanfor feilmarginen.

Uvisse ved dei sesongjusterte tala

Føremålet med å justera for sesongvariasjon, er å beskriva utviklinga gjennom året og gje tal på endringar for den siste tremånadsperioden, som er reinsa for normale sesongsvingingar. Kvalitetstestar syner at dei sesongjusterte tala for AKU-arbeidsløysa er usikre. Sesongjusteringsmetoden har vanskar med å identifisera eit stabilt sesongmønster i denne talserien. Dei tilfeldige utslaga er relativt store i forhold til sesongkomponenten. I tillegg er det relativt få arbeidslause i utvalet, slik at uvissa blir stor. Dette gjer at tala må tolkast med varsemd. For å redusera utvalsuvissa, er dei publiserte AKU-tala tremånads glidande gjennomsnitt av dei sesongjusterte tala. Til dømes er talet for oktober gjennomsnittet av overslaga for september, oktober og november.

Tabeller:

• Tabell 1. Sysselsetjing og arbeidsløyse for personar 16-74 år. Sesongjusterte tal, tremånads glidande gjennomsnitt. Absolutte tal i 1 000 og arbeidslause i prosent av arbeidsstyrken