Fleire på camping og hyttegrend

Tal frå overnattingsstatistikken syner at det samla var om lag 960 000 overnattingar ved kommersielle overnattingsverksemder i mars i år. Det er ein reduksjon på 6,3 prosent samanlikna med mars i 2020. For hotella fortsette nedgangen, men solid auke i overnattingane ved campingplassane, hyttegrendene og vandrarheimane, bidrog til å dempe nedgangen. Etter eit år med koronatiltak, fortsette nedgangen i det samla talet på overnattingar.

Nærmare normalen på campingplassane

Det var om lag 171 000 overnattingar ved norske campingplassar i mars. Det var nesten ei dobling frå mars i fjor. Det var om lag 92 000 fleire norske overnattingar, medan utanlandske vart redusert med 7 000 overnattingar. Samanlikna med tidligare periodar var det fleire overnattingar i mars i år enn det var i både mars i 2019 og i 2017, men i begge desse åra fall påskeuka i april. Det var fleire norske overnattingar som bidrog til auken. Dei utanlandske overnattingane sank som følgje av at det var strengare innreiserestriksjonar i mars i år enn i mars 2020.

I midten av mars 2020 måtte mange av campingplassane stenge da det vart innført ei rekke koronarestriksjonar. I mars i år haldt langt fleire campingplassar opent heile månaden noko som bidrog til den kraftige auken i overnattingar. Ei anna medverkande årsak til auken var at første del av påska fall i mars i år, medan den var i april i fjor. Når påska faller har stor innverknad på tala.

Nedturen for hotella held fram

Etter eit år med kornarestriksjonar fortsett nedgangen i overnattingar ved hotella. Det var om lag 633 000 overnattingar ved norske hotell i mars i år. Dette er 23 prosent færre målt mot mars i 2020. Det var 52 000 færre norske overnattingar og 133 000 færre utanlandske.

Dei fleste fylka hadde færre overnattingar, unntaka var blant anna fylka på vestlandskysten. Rogaland og Møre og Romsdal hadde ein auke på høvesvis 14 og 5,3 prosent, medan Vestland var om lag uendra. Svalbard auka med 6,3 prosent.

Fleire overnattingar på hyttegrend og vandrarheim

• 154 000 overnattingar i mars 2021
• 36 000 fleire enn mars sist år
• Norske overnattingane auka på om lag 84 000
• Det var 49 000 færre utanlandske overnattingar

 

Eurostat har laga ein oversikt over viktige korttidsindikatorar og deira utvikling under koronapandemien. Der kan man få ein visuell oversikt over utviklinga i overnattingar i ulike europeiske land.