Fleire nordmenn på camping og hyttegrend i september

Tal frå overnattingsstatistikken syner at det var om lag 1,8 millionar overnattingar ved kommersielle overnattingsverksemder i september i år. Det er nesten 1 million færre enn i september i fjor. Talet på totale norske overnattingar gjekk ned med 20 prosent, medan utanlandske overnattingar fall med heile 73 prosent. Norske overnattingar fall med 29 prosent på hotella, medan dei auka med 11 prosent på campingplassar, og 32 prosent på hyttegrender og vandrarheim.

- Nordmenn er glad i å reise, og vi har sett at camping og hytter, der du kan være saman i ei lita gruppe er populært under pandemien, seier rådgivar Kristin Aasestad i SSB.

Restriksjonar for å stogge pandemien i september var særskilt knytt til innreise for utanlandske turistar, samt restriksjonar knytt til sosial distansering som gjerne gjer seg gjeldande på hotell, og dette synes godt i tala.

Store regionale skilnader

I september, som vi òg har sett i tidlegare månader under pandemien, var det store regionale skilnadar på kor i landet det var endringar målt mot same månad året før. Det var fleire totale overnattingar for Agder i september i år mot september i fjor, medan alle andre fylka hadde ein nedgang. Nedgangen var spesielt stor i Oslo, Vestland, Viken og på Svalbard.

Ser vi nærmare på kor i landet veksten var størst i norske overnattingar på campingplassar, hadde alle fylka bortsett frå Vestfold og Telemark fleire norske overnattingar. Auken i norske overnattingar på campingplassar var særskilt kraftig i Agder, men også i Møre og Romsdal, Nordland og Innlandet.

Eit tilsvarande blikk på hyttegrend og vandrarheim syner at alle fylka bortsett frå Trøndelag hadde ei auke. Særskilt Viken med ein dobling, skilte seg ut med langt fleire norske overnattingar.

Stor nedgang på hotell i september

Det var om lag 1,3 millionar overnattingar ved norske hotell i september i år. Dette er 42 prosent færre målt mot september i 2019. Nedgangen i norske og utanlandske overnattingar bidrog om lag like mykje til fallet, sjølv om den prosentvise nedgangen var høgare for dei utanlandske. Blant utlendingane var det færre overnattingar frå USA, Kina og Tyskland som bidrog i størst grad til nedgangen i overnattingar. September er ein månad der det tradisjonelt er ein del overnattingar med yrke, og kurs og konferanse som formål. I september var nedgangen i talet på overnattingar med yrke som formål like stor som nedgangen i overnattingar med ferie og fritid som formål.