Skatterekneskap, november 2013

I november månad blei det betalt inn 117,9 milliardar kroner, og dette er den største skatteinnbetalinga så langt i 2013. Innbetalingane i november månad var for det meste innbetalingar av personlege skattytarar som inkluderer innbetalingar til folketrygda og arbeidsgjevaravgifta. Personlege skattytarar har innan utgangen av november betalt inn 577,3 milliardar kroner. Det er ein auke på 6,4 prosent, eller 34,7 milliardar kroner, frå same perioden i fjor.

Høgare skattinntekter til staten

Staten har frå januar til november i år motteke til saman 239,9 milliardar kroner i fellesskatt samt formues- og inntektsskatt. Det er ein oppgang på 4,6 prosent, eller 10,5 milliardar kroner. Den største posten i skatteinntekter til staten er fellesskatt, som utgjorde 209 milliardar kroner av dei nesten 240 milliardane.

5,7 prosent vekst i skatteinntektene til kommuneforvaltninga

Samanlikna med den tilsvarande perioden i fjor har skatteinntektene til fylka og kommunane så langt i 2013 stige med 5,7 prosent, eller 8,3 milliardar kroner, til 152,4 milliardar kroner. Formues- og inntektsskatt til kommunane står for mesteparten av skatteinntektene til kommuneforvaltninga, med 125,6 milliardar kroner. Både for kommunane og fylka er det ein auke på 5,7 prosent.

7,2 prosent meir som arbeidsgjevaravgift og andre folketrygdinnbetalingar

Til saman 258,2 milliardar kroner har blitt betalt inn til folketrygda innan utgangen av november, ein auke på 7,2 prosent. 110 milliardar kroner er betalt inn i medlemsavgift til folketrygda og 148,2 milliardar kroner er betalt inn i arbeidsgjevaravgift. Dette er ein auke på høvesvis 7,3 prosent og 7,1 prosent frå same perioden i fjor.