Fiskeri (avslutta i Statistisk sentralbyrå), 2007, førebelse tal

Denne utviklinga går fram av førebelse tal per 10. august.

Norske fartøy leverte 1,4 millionar tonn fisk og skaldyr 1. halvår i år. Dette er 6 prosent meir enn i 1. halvår 2006.

Størst auke har det vore i fangstane av sild, tobis og lodde, medan fangstane av kolmule, sei og brisling har minka.

Torskefangsten auka med nær 5 prosent til 162 000 tonn. Førstehandsverdien steig frå 2,2 milliardar kroner til 2,7 milliardar kroner, ein auke på 21 prosent frå 1. halvår 2006. Dette tilsvarar 12 prosent av den totale fangstmengda og 41 prosent av total førstehandsverdi.

Meir sild, men lågare verdi

Det blei fiska 359 000 tonn sild første halvår 2007. Dette er ein auke på 24 prosent samanlikna med første halvår 2006. Førstehandsverdien sank med 9 prosent, til 878 millionar kroner. Sildefangstane utgjorde 26 prosent av den totale fangstmengda og 13 prosent av total førstehandsverdi.

Fangsten av kolmule gjekk ned med 12 prosent, til 514 000 tonn, og utgjorde 37 prosent av den totale fangstmengda.

Av den totale fangstmengda gjekk 52 prosent til konsum, medan 48 prosent gjekk til industri. Tilnærma all fangst av kolmule og tobis og 18 prosent av sildefangsten gjekk til industri i første halvår 2007.