Produksjonsindeks for olje og gass, industri, bergverk og kraftforsyning, april 2000

Vekekorrigerte tal for april 2000 viser at produksjonen innanfor industrien var om lag 4 prosent lågare enn i april 1999. Ein klår nedgang innanfor produksjon av investeringsvarer og innsatsvarer har verka inn på dette. Maskinvare-, metallvare- og transportmiddelindustrien har hatt den svakaste utviklinga dei siste 12 månadene. Endringstala må handsamast med varsemd då påska i år fall i april, medan den var delt mellom mars og april i 1999. Dei same næringane har likevel hatt ei klår negativ utvikling når vi samanliknar dei fire første månadene i 2000 med tilsvarande periode i 1999. Her har til dømes metallvareindustrien hatt ein nedgang på om lag 10 prosent. Nærings- og nytingsmiddelindustrien og kjemisk industri er med på å trekkje ned produksjonen innanfor industrien frå mars til april i år.

Produksjon av energivarer

Ein sesongjustert nedgang i produksjonen av energivarer frå mars til april i år trekkjer ned totalindeksen. Ein nedgang i gassproduksjonen i april gjer at indeksen for olje- og gassutvinning fell om lag 5 prosent frå mars til april. Samla produksjon av energivarer frå januar til april i år er likevel større enn i tilsvarande periode i fjor.