Sal av petroleumsprodukt og flytande biodrivstoff, august 2006, førebelse tal

Til tross for at det samla salet av petroleumsprodukt er nesten identisk i august 2005 og 2006, er det store skilnader i salet av dei ulike petroleumsprodukta. Gjennom heile 2006 har salet av bilbensin vorte redusert, medan salet av autodiesel har auka. I august heldt reduksjonen i salet av bilbensin fram, da det vart selt 193 millionar liter, ein reduksjon på 3,5 prosent samanlikna med august i fjor. Salet av autodiesel auka i same periode med 8,2 prosent, frå 223 millionar liter til 241 millionar liter. Salet av bilbensin og autodiesel står for til saman 49,4 prosent av det totale salet av petroleumsprodukt i august 2006.

Meir til fyring

Salet av fyringsparafin hadde ein auke på 22,3 prosent og lette fyringsoljer ein auke på 12,8 prosent i august 2006 samanlikna med same periode i 2005. Til saman vart det selt 50 millionar liter lette fyringsprodukt i august i år.

Marine gassoljer utgjer om lag 18 prosent av det totale salet av petroleumsprodukt med 157 millionar selde liter i august 2006. Salet vart redusert med 3,7 prosent samanlikna med same periode i 2005.

I august i år vart det selt 90 millionar liter jetdrivstoff, dette er ein auke på 11,1 prosent eller 9 millionar liter samanlikna med same periode i 2005.

Det var 23 utkøyringsdagar i august i år, det same som i 2005.

Tabeller:

• Tabell 1 Sal av petroleumsprodukt, etter produkt. Millionar liter. Førebelse tal
• Tabell 2 Sal av petroleumsprodukt, etter kjøpargruppe. Millionar liter. Førebelse tal
• Tabell 3 Sal av petroleumsprodukt, etter fylke. Tolvmånadersperiodar. Millionar liter. Førebelse tal