Sal av petroleumsprodukt og flytande biodrivstoff, april 2006, førebelse tal

På grunn av at påska kom i mars i 2005 og i april i 2006, vart det fire færre utkjøringsdagar i april i år. Difor vil ikkje omsett volum vere direkte samanliknbart med tala i fjor. Det samla salet av petroleumsprodukt var på 736 millionar liter i april, ein svak auke på 1,3 prosent samanlikna med april 2005.

Sal av drivstoff

Gjennom heile 2006 har salet av bilbensin blitt redusert, medan salet av autodiesel har auka. I april held reduksjonen i salet av bilbensin fram, da det vart selt 163 millionar liter, ein reduksjon på 4,1 prosent. Men april syner også ein reduksjon i salet av autodiesel for første gong i år, frå 199 millionar liter i april 2005 til 191 millionar liter i 2006. Salet av bilbensin og autodiesel står for til saman 48 prosent av det totale salet av petroleumsprodukt.

Meir til fyring

Salet av fyringsoljer auka i april 2006. Lette fyringsoljer hadde ein auke på 18,2 prosent, medan salet av tung fyringsoljer auka med 11,5 prosent. Samla var det selt 100 millionar liter fyringsolje i april 2006, ein auke på 12 millionar liter samanlikna med same periode i 2005.

Marine gassoljer utgjer om lag 20 prosent av det totale salet av petroleumsprodukt. I 1. kvartal 2006 auka salet av produktet med 5,1 prosent, eller 8 millionar liter.

Salet av jetdrivstoff auka også i april, frå 57 millionar liter selt i april 2005 til 70 millionar liter selt i april 2006, ein auke på 21,6 prosent.

Det var 17 utkjøringsdagar i april i år, mot 21 i april 2005.

Tabeller:

• Tabell 1 Sal av petroleumsprodukt, etter produkt. Millionar liter. Førebels tal
• Tabell 2 Sal av petroleumsprodukt, etter kjøpargruppe. Millionar liter. Førebels tal
• Tabell 3 Sal av petroleumsprodukt, etter fylke. Tolvmånadersperiodar. Millionar liter. Førebels tal