Elektrisitet, desember 2003

Det har vore netto import i nesten alle månadene i 2003, og ikkje sia 1996 har Noreg importert så mykje straum som i desember. Det blei importert 1 424 GWh og eksportert 253 GWh. For heile 2003 importerte Noreg 13 463 GWh og eksporterte 5 589 GWh. I 2002 var importen derimot 5 329 GWh, medan eksporten var 15 002 GWh. Variasjonen mellom netto import og eksport har samanheng med svingingar i produksjonen. Sjølv om produsentane har høve til lagre noko vatn i magasina når det er overskot, vil produksjonen likevel variere noko frå år til år. I eit år med normale nedbørsmengder tilsvarer nedbøren eit produksjonspotensial på 118 TWh. I 2003 var total produksjonen 107 267 GWh, medan han var 130 601 GWh i 2002. Ved inngangen til 2003 var fyllingsgraden i vassmagasina mykje lågare enn normalt etter ein kald haust med lite nedbør. Sjølv om Noreg fekk 110 prosent av normalen med nedbør i 2003 var underskotet i kraftbalansen ved inngangen til 2003 ei medverkande årsak til den låge produksjonen.

Lågt forbruk i fjor

Bruttoforbruket var 115 141 GWh i 2003, - ein nedgang på 4,8 prosent samanlikna med 2002. Det låge forbruket i 2003 kan forklarast av høg straumpris og varmare vêr enn normalt. Temperaturen var 1,3 grader over normalen i 2003, og året var det sjette varmaste sidan målingar starta i 1867. Varmt vêr reduserer etterspørselen etter straum til oppvarming gjennom store delar av året. Gjennomsnittleg straumpris i engrosmarknaden var 29 øre/KWh i 2003 og resulterte i høge sluttbrukarprisar. I 2002 og 2001 var engrosprisen høvesvis 20,1 og 18,6 øre/KWh. Den høge straumprisen i 2003 gav insentiv om å redusere straumforbruket. I desember 2003 var bruttoforbruket 11 707 GWh, - ein nedgang på 5,5 prosent samanlikna med desember 2002.

Sjå også Vannmagasinenes fyllingsgrad og Priser på elektrisk kraft

Tabeller:

• Tabell 1 Produksjon, import, eksport og forbruk av elektrisk kraft. GWh. Førebelse tal