Fall i industriproduksjonen i april

Indeksnivået for industriproduksjonen var på 116,1 (2005=100) i perioden februar-april 2020 mot 119,3 i føregåande tremånedersperiode. Figur 1 visar at dei sesongjusterte tala har hatt ei relativt stabil utvikling det siste året, før produksjonen fall kraftig frå og med mars.

Merk at grunna behandlinga av mars og april som ekstremverdiar er ikkje trendutviklinga etter dette representativ for faktisk utvikling. Trenden har difor blitt tatt ut frå figur 1 for dei seinaste månadene. For meir informasjon, sjå informasjonsboksen om koronaviruset i slutten av artikkelen.

 

Månadsendring: store bransjevise skilnader i april

Sesongjusterte tal viser at industriproduksjonen fall med 1,6 prosent frå mars til april 2020. Dette fallet kjem etter ei nedgang på 3 prosent frå februar til mars. Det var særleg arbeidsintensive næringar som opplevde stor nedgang i perioden, deriblant fleire av næringane innafor petroleumsretta leverandørindustri. Strenge smittevernreglar og karantene for tilsette blei meldt som viktige årsakar bak den låge aktiviteten. Det var bygging av skip og oljeplattformar samt næringsgruppa møbelindustri og annan industri som bidrog mest til den samla nedgangen, med fall på høvesvis 15 og 29 prosent.

På den motsette sida bidrog kjemiske råvarer saman med næringsgruppa dataindustri og elektrisk utstyrsindustri til å dempe det samla produksjonsfallet i april med ein klår oppgang på 9,4 og 6,1 prosent høvesvis.

Tremånadsendring: klår nedgang i industriproduksjonen

Sesongjusterte tal viser at industriproduksjonen gjekk ned med heile 2,7 prosent i perioden februar-april 2020 samanlikna med førre tremånadersperiode. Det var den låge produksjonen i mars og april som trekte ned aktiviteten samla sett i denne perioden. Bygging av skip og oljeplattformer bidrog klart mest til nedgangen, medan næringsmiddelindustrien trekte den samla utviklinga i motsett retning med ein solid produksjonsauke i perioden.

Månadsendring: kraftig fall i Eurosona i mars 2020

Estimerte tal frå Eurostat, statistikkontoret i EU, viser at den samla industriproduksjonen i land i eurosona fall med heile 12 prosent frå februar til mars 2020. Denne kraftige nedgangen skyldast dei ulike tiltaka som vart iverksett for å hindre spreiinga av koronaviruset. Det var produksjon av varige konsumvarer, som til dømes bilar, som hadde størst nedgang, etterfult av produksjon av investeringsvarar. Det landet som opplevde størst fall i industriproduksjonen var Italia, med ein nedgang på over 30 prosent.

I den same perioden hadde industriproduksjonen i Noreg ein nedgang på 3 prosent. Sverige hadde ein marginal nedgang på 0,2 prosent, og Danmark hadde ein nedgang på 0,4 prosent.

For meir informasjon om utviklinga i europeisk industriproduksjon i mars, sjå denne artikkelen frå Eurostat.

Tremånadersendring: auke i oljeproduksjonen og kraftforsyning

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein oppgang på 2 prosent i perioden februar-april 2020 samanlikna med førre tremånadersperiode, viser sesongjusterte tal. Utvinning av råolje hadde ein klår oppgang på 8,4 prosent, medan utvinning av naturgass hadde ein auke på 1,2 prosent. For fleire detaljar om olje- og gassproduksjonen i denne tremånadersperioden, sjå pressemelding frå Oljedirektoratet.

Utvinningstenester hadde ein nedgang på 4,7 prosent i perioden. Nedgangen kan mellom anna knytast til strenge smittevernreglar og den låge oljeprisen. Bergverksdrift hadde ein oppgang på 4,9 prosent, medan det for norsk kraftforsyning var ein vekst på heile 18 prosent i denne perioden. Det var særleg høg kraftproduksjon i mars og april som mellom anna skuldtast eit behov for å gjera plass til mykje vanntilsig i magasina når snøsmeltinga startar for fullt.