Folkemengde og befolkningsendring, 2. kvartal 2014

Folketilveksten på 13 300 er 800 lågare enn i 2. kvartal 2013, og den noko minkande folketilveksten heng saman med lågare nettoinnvandring frå utlandet. Ein må tilbake til 2. kvartal 2007 for å finne lågare folketilvekst i 2. kvartal. Flytteoverskotet frå utlandet på 7 300, er resultatet av vel 13 800 innvandringar og 6 450 utvandringar . Samanlikna med tilsvarande kvartal i fjor var det vel 2 300 færre innvandringar, og 1 500 færre utvandringar.

Det blei født nær 15 800 i 2. kvartal, og 9 800 døydde. Det er 100 fleire fødde og nokre fleire døde enn i fjor, og fødselsoverskotet blei dermed om lag 50 høgare.

Flest polakkar og litauarar innvandra

Av dei med utanlandsk statsborgarskap som innvandra til Noreg, var det framleis flest polakkar. Med 2 000 innvandringar stod dei for 14 prosent av alle innvandringane til landet i 2. kvartal. Det var òg mange litauarar og svenskar som innvandra, respektive 950 og 800. Deretter fylgde eritrearar, rumenarar og filippinarar med noko mindre enn 500 innvandringar kvar.

Som i 2. kvartal i fjor var det størst nettoinnvandring blant dei med polsk og litauisk statsborgarskap. Svenske statsborgarar hadde som tidlegare år mange flyttingar til og frå Noreg. I 2. kvartal i år flytta om lag 800 svenskar til Noreg, og 900 flytta frå Noreg. Året før stod grannefolket for om lag 1 000 innvandringar og 1 000 utvandringar.

Blant dei som flytta til og frå Noreg i 2. kvartal, stod norske statsborgarar for om lag 1 900 av innvandringane og 1 700 utvandringar.

Folketalet auka mest i Akershus

I alle fylka, bortsett frå i Sogn og Fjordane, voks folketalet i 2. kvartal. Innbyggjartalet i Akershus voks med 3 200, mest av alle fylka. Sett i høve til folketalet var det òg Akershus som hadde den kraftigaste veksten. Deretter fylgde Vest-Agder, Rogaland og Aust-Agder.

I høve til folketalet var det Oslo, Rogaland og Sør-Trøndelag som hadde størst fødselsoverskot, medan Hedmark og Oppland hadde fødselsunderskot i 2. kvartal.

Størst innanlandsk flytteoverskot i Akershus

Bortsett frå Oslo hadde alle fylka rundt indre Oslofjord flyttevinst i 2. kvartal. I tillegg hadde Oppland, Agderfylka og Rogaland flyttevinst. Sett i høve til folketalet var det størst innanlandsk flytteoverskot i Akershus, Østfold og Vestfold.

Sogn og Fjordane og Oslo hadde størst innanlandsk flyttetap sett i høve til folketalet, og Nord-Trøndelag hadde innanlandsk flyttebalanse med like mange inn- som utflyttingar overfor landet elles.

Flyttevinst frå utlandet i alle fylka

Alle fylka hadde flyttevinst frå utlandet. Størst flyttevinst sett i høve til folketalet hadde Finnmark, Oslo og Troms.

Folketalet auka med 28 600 hittil i år

Det vart født 30 100 barn i løpet av fyrste halvår 2014, og 20 200 døydde. Fødselsoverskotet på nær 10 000 var 1 300 høgare enn i fyrste halvår i fjor då det var 300 færre fødde og 1 000 fleire døde. Med 32 900 innflyttingar og 14 300 utflyttingar hittil i år enda flytteoverskotet på 18 600. Flytteoverskotet blei dermed 800 høgare enn i fyrste halvår 2013. Dette heng saman med høge utvandringstal i fyrste halvår i fjor som igjen heng saman med at Det sentrale folkeregisteret, spesielt i 1. kvartal 2013, utregistrerte svært mange utanlandske statsborgarar som tidlegare hadde flytta frå landet utan å melde frå. Dei siste åra har denne typen oppryddingar i folkeregisteret vore vanlege, men med noko mindre omfang enn i fyrste halvår 2013.