Folkemengde og befolkningsendring, 4. kvartal 2009

Sett i høve til folketalet var folkeveksten 1,2 prosent. Sidan 1900 har veksten berre vore høgare i prosent i åra 1920, 1946 og 2008.

Sjølv om innflyttingsoverskotet frå utlandet (38 600) var 4 700 mindre enn i 2008, bidrog det likevel til vekst i folketalet i mange kommunar. Som følgje av innvandringa auka innbyggjartalet i 300 kommunar i staden for 191 som det hadde vore utan dette overskotet. Det vart registrert 65 200 flyttingar til Noreg frå utlandet i 2009, 1 800 mindre enn året før. 26 550 flytta ut, 2 900 fleire enn i 2008.

Dei som er i landet kortare enn seks månader vert ikkje registrerte som innflytta, og er difor ikkje medrekna i folketalet.

Fødselsoverskot på 20 350; samla fruktbarheitstal på 1,98

Det vart fødd 61 800 born her i landet i 2009, 1 300 fleire enn i 2008. 41 450 personar døydde, 250 mindre enn førre året. Talet på fødde er det høgaste sidan 1972, og på dei siste 100 åra har det vore høgare berre i nokre år kring fyrste verdskrigen, og deretter i åra frå 1944 til 1972. Ikkje sidan rundt 1980 har talet på daude vore lågare enn i åra 2004-2009. Fødselsoverskotet (fødde minus daude) på 20 350 har ikkje vore høgare sidan 1973.

Samla fruktbarheitstal for 2009 er utrekna til 1,98, noko som er av det aller høgaste i Europa. Talet var 1,96 i 2008 medan det på midten av 1980-talet varierte mellom 1,66 og 1,75.

Ein gut som vart fødd i 2009 kan venta seg ein levealder på 78,60 år (opp frå 78,31 i 2008), medan ei jente kan venta seg 83,05 år (mot 82,95 i 2008). Dette er òg høgt i europeisk samanhang.

Framleis flest polakkar

Samanlikna med 2008 gjekk innflyttingsoverskotet frå utlandet ned med 4 700 til 38 600 personar. Det største overskotet stod polske statsborgarar for, med 6 900 fleire inn- enn utflyttingar. Dette er likevel ei halvering frå året før. Etter det følgjer statsborgargruppene frå Sverige og Litauen, som kvar seg sytte for eit innflyttingsoverskot på mellom 2 900 og 2 600.

Den europeiske innvandringa varierte i året

Inn- og utvandringa av europeiske statsborgarar endra seg mykje gjennom året i 2009. Medan innvandringa frå og med slutten av 2008 til og med 3. kvartal 2009 var mindre enn i same kvartal året før, endra det seg i 4. kvartal, slik at innvandringa då var større. Motsett var utvandringa kvartal for kvartal større enn året før, heilt til 4. kvartal då det utvandra færre enn i same kvartal 2008. Dette førte til at nettoinnvandringa frå Europa i 2009 var lågare enn i 2008 heilt fram til 4. kvartal, då nettoinnvandringa var 1 800 større enn i same kvartal 2008.

Fire fylke stod for 60 prosent av folkeveksten

I 2009, som i 2008, voks folketalet mest i Oslo (11 400), følgd av Akershus, Hordaland og Rogaland. Desse fire fylka stod for 60 prosent av folkeveksten i landet. I Oslo og Akershus voks folketalet med 3 800 mindre enn det gjorde i 2008, medan det i Rogaland og Hordaland voks like mykje som førre året. Ikkje i noko fylke gjekk folketalet ned.

Som i dei siste åra, var det fødselsoverskot i alle fylka i landet, sett bort frå Hedmark, Oppland og Telemark. Fødselsoverskotet var størst i Oslo, med 5 900 fleire fødde enn daude.

Ikkje noko fylke hadde flyttetap i 2009 når ein ser på alle flyttingar under eitt. Eit slikt samla innflyttingsoverskot var i 2009, som i dei siste åra, størst for Oslo, Akershus, Hordaland og Rogaland.

Innanlandske flyttingar - Akershus var sigraren

Akershus og Østfold hadde den største flyttevinsten i høve til dei andre fylka i 2009. Til Akershus flytta det 2 600 fleire enn det flytta ut av fylket. Tolv fylke hadde flyttetap til andre fylke. Dette var størst for Nordland, med 1 100. Sett i høve til folketalet hadde Akershus og Østfold største flyttevinsten, medan Finnmark og Sogn og Fjordane hadde største innanlandske flyttetapet.

Flyttevinst frå utlandet vog opp

Alle 19 fylka hadde - som vanleg dei seinare åra - ein flyttevinst frå utlandet. Størst var han i Oslo, med 6 200 fleire innflyttingar enn utflyttingar frå utlandet, sjølv om det var ned frå 10 000 i 2008. Samla flyttevinst frå utlandet var 9 850 i Oslo og Akershus samla, og 8 400 i Rogaland og Hordaland samla. I alt stod desse fire fylka for mest helvta av den samla flyttevinsten frå utlandet til heile landet. Sett i høve til folketalet var det Sogn og Fjordane som hadde største flyttevinsten frå utlandet, medan Nord-Trøndelag hadde minste.

Ein nasjonal flyttevinst på i alt 38 600 vog mykje opp for det innanlandske flyttetapet i mange fylke, og for eit lite fødselsunderskot i tre fylke.

Kommunane: Folketalet voks i 300 kommunar

Folketalet voks i 300 av dei 430 kommunane i landet i 2009 (31 fleire enn i 2008), medan det gjekk ned i 119 kommunar. I tillegg til dei største byane og kommunane, hadde Skedsmo og Ullensaker, med 2 000 samla, ein stor vekst i folketalet. Største folketapet hadde Høyanger følgd av Eidskog. Av dei 42 kommunane som hadde eit tap i høve til folketalet på meir enn 1 prosent, var 22 i Nord-Noreg.

Som i tidlegare år er det i dei sentrale kommunane at folketalet aukar, medan dei mindre sentrale stroka gjerne har både flyttetap og fødselsunderskot.

Stor skilnad på fødselsoverskotet i kommunane

I alt 224 av kommunane hadde eit fødselsoverskot, medan 196 hadde eit fødselsunderskot. Største fødselsunderskotet hadde Kongsvinger, der det døydde 62 fleire enn det vart fødd - følgd av dei tre nabokommunane Eidskog, Åsnes og Grue. Av dei 25 kommunane med størst fødselsunderskot, var 13 i Hedmark og Oppland.

Av dei 15 kommunane som hadde størst fødselsoverskot i høve til folketalet (1 prosent eller høgare), var 7 av dei i Rogaland.