Oslo-hotella hardast ramma av koronapandemien i august

Tal frå overnattingsstatistikken syner at det var om lag 3,5 millionar overnattingar ved kommersielle overnattingsverksemder i august i år. Det er 29 prosent færre enn i august i fjor. Talet på norske overnattingar gjekk ned med 1,8 prosent, medan utanlandske overnattingar fall med 70 prosent.

Det var færre overnattingar frå Tyskland, Nederland, USA og Sverige som bidrog mest til denne nedgangen.

– Restriksjonar for å stogge pandemien i august var særskilt knytt til innreise for utanlandske turistar, og ettersom august er ein tradisjonell feriemånad for europearar synes dette godt i tala, seier rådgivar Kristin Aasestad i SSB.

Det var ein kraftig nedgang i overnattingar frå Norge på hotell og på hyttegrender, medan campingplassane hadde klart fleire norske overnattingar. Denne trenden har vi sett sidan mars, der vi etter pandemien starta har sett eit noko annleis overnattingsmønster enn tidlegare.

Framleis tøffe tider for hotella

Det var om lag 1,3 millionar færre overnattingar ved norske hotell i august i år målt mot same månad året før. Nesten 1 av 3 av dei færre overnattingane var ved hotella i Oslo, som saman med ein kraftig nedgang i Viken og Vestland bidrog klart mest til den sterke nedgangen i august.

Vestland skilte seg noko ut frå dei to andre fylka. Her var talet på overnattingar frå Norge om lag uendra, men ein nedgang på nesten 280 000 utanlandske overnattingar førte til at hotella var hardt ramma også her. Agder skilte seg ut som det einaste fylket med fleire hotellovernattingar.

Auken i norske campingovernattingar hald fram

Det var 33 prosent fleire norske overnattingar på campingplassane i august i år enn i august i fjor. Dette er ein trend vi har sett gjennom koronapandemien. Sidan april har talet på norske campingovernattingar auka samanlikna med same månad året før. Nedgangen i utanlandske overnattingar, særskilt tyskarar, nederlendarar og svenskar førte til ein samla nedgang på campingplassane på 4,6 prosent.

Svalbard er framleis ramma

• Overnattingar sank med 58 prosent frå august i fjor til august i år
• Utanlandske overnattingar fall med 80 prosent
• Norske overnattingar fall med 21 prosent