Skatterekneskap, oktober 2001

Det er særleg oljeskattane som medverkar til den store auken i den totale skatteinngangen. Innbetalte skattar frå kontinentalsokkelen er nesten dobla sidan same periode i fjor. Hittil i år er samla innbetaling frå ordinær skatt og særskatt på olje i overkant av 99 milliardar kroner, mot om lag 52 milliardar i fjor. Dei store innbetalingane i oktober kjem av terminforfall for innbetaling for 1. termin 2001. Høg oljepris og sterk dollarkurs tidlegare i år er faktorar som har stor innverknad på innbetalte skattar frå kontinentalsokkelen.

Ser ein bort ifrå oljeskattane, er skatteauken for Fastlands-Noreg på 11,9 prosent. Utanom olje er den totale skatteinngangen hittil i år på 262 milliardar kroner, mot 235 milliardar same periode i fjor. Årsaka til veksten kan ein mellom anna tilskrive auke i innbetaling av etterskotsskatt og ein generell høg lønns- og sysselsetjingsvekst.

Kommuneforvaltninga

For kommuneforvaltninga samla er det hittil i år betalt inn 84 milliardar kroner i skatt. Dette er ein auke på 16,4 prosent samanlikna med tilsvarande periode i fjor, då innbetalte skattar til kommunesektoren var på om lag 72 milliardar kroner. Auken i inntektsskattane er som følgje av at skattedelen blir opptrappa på kostnad av rammetilskotet til kommunane. Det vil seie auka skattøyre til kommunane mot ein tilsvarande reduksjon i fellesskatten.

Auke i alle fylka

Skatteinngangen fordelt på fylke syner at alle fylka har hatt ein auke i skatteinngangen samanlikna med same periode i fjor. Østfold har hatt den største auken. Skatteinntektene der har auka med 15,5 prosent samanlikna med tilsvarande periode i fjor. Deretter kjem Oslo og Hordaland med 15,2 og 14,2 prosent auke. Finnmark er det fylket med lågast skatteauke, sjølv om skatteinngangen der har auka med 7,9 prosent samanlikna med i fjor.

I samband med løpande inntektsutjamning som blei innført frå og med januar 2000, vil innbetalt og fordelt skatt kvar månad inngå i grunnlaget for utrekning av rammeoverføringane til kommunane. Informasjon om befolkningstala for dei ulike kommunar per 1. januar finst i pdf-format her.

Tabeller:

• Tabell 1 Skatterekneskapsstatistikk. Innbetalt og fordelt skatt, etter ordning og art. Januar-oktober 1999, 2000 og 2001. Millionar kroner
• Tabell 2 Skatterekneskapsstatistikk. Innbetalt og fordelt skatt. Januar-oktober 2000-2001. Millionar kroner
• Tabell 3 Skatterekneskapsstatistikk. Innbetalt og fordelt skatt. Januar-oktober 2001. Millionar kroner