Landbruksundersøkinga, 2003, førebelse tal

Av ein samla arbeidsinnsats på driftseiningane i jordbruket på 141 millionar timeverk, blei 130 millionar timeverk utførte i jord- og hagebruk. Arbeidsinnsatsen i skogbruk utgjorde 4,5 millionar timeverk, medan arbeidsinnsatsen i tilleggsnæringar utgjorde 6,3 millionar timeverk. Arbeidsinnsats på skogeigedomar som ikkje blei drivne i kombinasjon med jordbruk, er ikkje rekna med.

Frå 1998/99 til 2002/03 gjekk den samla arbeidsinnsatsen på driftseiningane ned frå 166 til 141 millionar timeverk. Dette tilsvarar ein reduksjon i talet på årsverk frå 88 500 i 1998/99 til 76 300 i 2002/03.

Jord- og hagebruk

Arbeidsinnsatsen i jord- og hagebruk tilsvarte 70 500 årsverk i 2002/03, ein nedgang på 10 300 årsverk sidan registreringa i 1998/99. Likevel blei det arbeidd 2 200 timar i gjennomsnitt i jord- og hagebruk i 2003, mot 2 100 timar fire år tidlegare. Dette kjem av at talet på driftseiningar har gått ned i perioden samstundes som produksjonen har vore relativt stabil. Brukarar og ektemakar/sambuarar utførte 73 prosent av dette arbeidet, medan familiemedlemmer og anna fast og tilfeldig hjelp utførte resten. Menn utførte tre fjerdedelar av arbeidet i jord- og hagebruk. Mannlege brukarar og ektemakar/sambuarar stod for 75 millionar timeverk, medan kvinnelege brukarar og ektemakar/sambuarar utførte 21 millionar timeverk.

Om lag 60 prosent av driftseiningane hadde eit arbeidsforbruk i jord- og hagebruk på eitt årsverk eller meir, medan vel ein femtedel hadde mindre enn eit halvt årsverk. Talet på driftseiningar med mindre enn eit halvt årsverk har blitt kraftig redusert i fireårsperioden, frå 32,5 til 21 prosent. I same perioden har det vore størst relativ auke i talet på einingar med 2,5 årsverk eller meir, frå 7,5 til 10,3 prosent av einingane.

Tilleggsnæringar

Arbeidsinnsatsen i tilleggsnæringar utanom skogbruk utgjorde 6,3 millionar timeverk i 2002/03. Tilleggsnæringar er aktivitetar som utnytter areal, bygningar eller maskiner tilhøyrande driftseininga. Dei viktigaste tilleggsnæringane var leigekøyring for andre, foredling av eige skogvirke og utleige av jakt- og fiskerettar. Leigekøyring for andre blei utført på 9 100 av dei 18 400 einingane som dreiv ein eller fleire tilleggsnæringar.

Samanlikning med tidlegare undersøkingar

Arbeidsinnsatsen i landbruket blei òg registrert i Landbruksundersøkinga 2001. Det har i ettertid vist seg at særleg arbeidsinnsatsen i hagebruk ikkje blei fanga opp i tilstrekkeleg grad i 2001-undersøkinga. Vi har derfor valt å samanlikne tala for 2003 med resultat frå jordbruksteljinga i 1999 i påvente av ei nærare gransking av 2001-tala.

Tilsvar fra Statistisk sentralbyrå til artikkel i Nationen lørdag 8. mai 2004: Statistisk sentralbyrå tryller ikke

Tabeller:

• Tabell 1 Arbeidsinnsats på driftseiningane. 1975/76-2002/03*. Millionar timeverk
• Tabell 2 Arbeidsinnsats i jord- og hagebruk, skogbruk og andre tilleggsnæringar på driftseininga, etter fylke. 1 000 timar
• Tabell 3 Arbeidsinnsats i jordbruk og hagebruk, etter kven som utførte arbeidet og fylke. 1 000 timeverk
• Tabell 4 Arbeidsinnsats i jord- og hagebruk på driftseininga, etter kjønn, kven som har utført arbeidet og fylke. 1 000 timeverk
• Tabell 5 Driftseiningar, prosentvis fordelt etter årsverk i jordbruk og hagebruk og fylke (Korrigert 11. mai 2004)
• Tabell 6 Tal driftseiningar med tilleggsnæringar og arbeidsinnsats i tilleggsnæringar, etter fylke. 1998/99 og 2002/03*