Husdyrhald, 1. januar 2006, førebelse tal

Ved årsskiftet var det til saman 36 380 jordbruksbedrifter med husdyr i Noreg, 1 733 færre enn året før.

Størst prosentvis nedgang har det vore i talet på bruk med verpehøner, 11 prosent, medan talet på bruk med svin gjekk ned med 10 prosent. Nedgangen i talet på bruk med storfe og bruk med sau var om lag 5 prosent. Blant bruka med storfe kom nedgangen blant mjølkeprodusentane, medan det var ein auke i bruk med ammekyr. Dette viser førebelse tal frå søknader om produksjonstilskott per 1. januar 2006.

Auke i talet på svin, slaktekylling og ammekyr

Det blei slakta 5 prosent fleire kyllingar i 2005 enn året før, og talet på slakta kyllingar nådde opp i knapt 42 millionar i 2005. Talet på alssvin auka med 2 700 til 101 700 per 1. januar 2006, ein auke på 2,7 prosent. Talet på ammekyr auka med 4 000 til 54 100 i 2006, 8 prosent fleire enn året før.

Talet på mjølkekyr gjekk ned med 6 200 til 266 100 i 2006, medan talet på mjølkegeit blei redusert med 2 100 til 44 000. Talet på verpehøner var 3,3 millionar i 2006, ein nedgang på 164 000 eller 4,7 prosent frå året før.

Større buskapar

Samstundes med nedgangen i talet på buskapar, aukar den gjennomsnittlege buskapsstorleiken. Eit bruk med mjølkekyr hadde i gjennomsnitt 12,8 mjølkekyr i 1995, medan gjennomsnittet for 2006 låg på 17,6. Sidan 1995 har talet på mjølkekyr blitt redusert med 18 prosent, medan det var 40 prosent færre bruk som dreiv mjølkeproduksjon i 2006 enn i 1995.

Dei som driv med sau hadde 65 vinterfôra sau på båsen i 2006, mot 46 i 1995. Det var om lag 34 000 færre vinterfôra sau i 2006 enn i 1995, medan talet på buskapar med sau gjekk ned med ein tredjedel i same perioden.

I 1995 hadde eit gjennomsnittleg bruk med alspurker 20 alssvin, medan tilsvarande tal for 2006 var 51. Talet på alspurker auka med 10 400 i perioden, medan talet på bruk med alspurker blei meir enn halvert.

Tabeller:

• Tabell 1 Jordbruksbedrifter med husdyr og jordbruksbedrifter med ymse husdyrslag per 1. januar, etter fylke
• Tabell 2 Talet på storfe og sau per 1. januar, etter fylke
• Tabell 3 Talet på ymse husdyr per 1. januar, etter fylke
• Tabell 4 Jordbruksbedrifter med ymse husdyrslag, etter buskapsstorleik. 1. januar