Husdyrhald, 1. januar 2005, førebelse tal

Nedgangen i talet på husdyrbrukarar frå 2004 til 2005 gjeld alle dei ulike dyreslaga. Størst prosentvis nedgang - 6 prosent - har det vore i talet på jordbruksbedrifter med verpehøner, medan talet på bruk med sau har gått ned med knapt 5 prosent.

Talet på storfe i alt auka med 1 600 frå 2004 til 2005. Talet på mjølkekyr gjekk ned med knapt 5 000 til 275 200, medan talet på ammekyr auka med 1 900 til 50 300.

Det vart registrert 99 200 alssvin i 2005, om lag det same som året før. Talet på slaktesvin auka frå 1,32 millionar i 2004 til 1,44 millionar i 2005. Dette har i periodar ført til overskott av svinekjøt.

Talet på vinterfôra sau gjekk ned med knapt 21 000 til 1,09 millionar i 2005. Dei siste fem åra har talet på sau lege mellom 1,09 og 1,12 millionar.

Større buskapar

I perioden 2000-2005 har talet på jordbruksbedrifter med mjølkeku gått ned med 4 000, frå 20 500 til 16 500, det vil seie at kvar femte mjølkeprodusent har avvikla i denne perioden. Samstundes har talet på mjølkekyr gått ned frå 298 700 til 275 200. Ein gjennomsnittleg mjølkeprodusent hadde 14,6 mjølkekyr på båsen i 2000, mot 16,7 i 2005.

Det var 2 200 jordbruksbedrifter med alssvin i 2005, mot 2 800 i 2000. Gjennomsnittleg tal alspurker per eining har derimot auka sterkt, frå 32 i 2000 til 44 i 2005.

I 2000 var det 21 500 ¹ jordbruksbedrifter med sau, medan tilsvarande tal for 2005 var 17 100, altså 4 400 ¹ færre enn fem år tidlegare. Også her har kvar femte eining med sau blitt lagt ned, og samstundes har den gjennomsnittlege buskapsstorleiken auka frå 52 til 64 vinterfôra sauer.

I 2005 var det knapt 2 600 jordbruksbedrifter med verpehøner, 1 000 færre enn fem år tidlegare. 28 prosent av einingane med verpehøner blei lagde ned frå 2000 til 2005, medan buskapsstorleiken auka frå 900 til 1 300.

Talet på jordbruksbedrifter med slaktekylling gjekk ned med 6 prosent frå 2000 til 2005. Samstundes auka talet på slaktekylling med 6,7 millionar til 39,8 millionar, og talet på slaktekylling per eining auka frå 62 000 til knapt 80 000.

Tabeller:

• Tabell 1 Driftseiningar i alt med husdyr og driftseiningar med ymse husdyrslag per 1. januar, etter fylke
• Tabell 2 Talet på storfe og sau per 1. januar, etter fylke
• Tabell 3 Talet på ymse husdyr per 1. januar., etter fylke
• Tabell 4 Driftseiningar med ymse husdyrslag, etter buskapsstorleik. 1. januar