Husdyrhald, 1. januar 2004, førebelse tal

Nedgangen i talet på husdyrbrukarar frå 2003 til 2004 gjeld alle dei ulike dyreslaga. Størst prosentvis nedgang har det vore i talet på bruk med verpehøner, 7,5 prosent, medan både talet på bruk med mjølkeku og bruk med sau har gått ned med mellom 5 og 6 prosent. Minst nedgang har det vore i talet på bruk med svin og bruk med slaktekylling, der reduksjonen har vore om lag 4 prosent.

Frå 2003 til 2004 gjekk talet på mjølkekyr ned med 4 200 til 278 600, medan talet på ammekyr auka med om lag 500 til 47 800. Talet på vinterfôra sau var 1,1 millionar i 2004, om lag det same som året før.

Større buskapar

Samstundes med nedgangen i talet på buskapar, auka den gjennomsnittlege buskapsstorleiken. Eit bruk med mjølkeku hadde i gjennomsnitt 17 mjølkekyr i 2004, medan gjennomsnittet i 1999 var 14. Dei som dreiv med sau hadde i middel 62 vinterfôra sauer i fjøset i 2004, mot 42 fire år tidlegare. Blant svineprodusentane har utviklinga vore enda meir markert. Dei som hadde alspurker, hadde i gjennomsnitt 42 alspurker i 2004, medan tilsvarande tal for 1999 var 26. Om lag halvparten av besetningane hadde 30 alspurker eller meir i 2004, medan berre ein tredjedel av besetningane hadde eit så høgt dyretal i 1999.

Talet på slaktekyllingar aukar

Det blei slakta 36,8 millionar kyllingar i 2003. Dette er 1,2 millionar fleire enn året før, og vel 9 millionar fleire enn for fire år sidan. Det var i overkant av 500 driftseiningar med slaktekylling i 2003.

Tabeller:

• Tabell 1 Driftseiningar i alt med husdyr og driftseiningar med ymse husdyrslag per 1. januar, etter fylke
• Tabell 2 Talet på storfe og sau per 1. januar, etter fylke
• Tabell 3 Talet på ymse husdyr per 1. januar, etter fylke
• Tabell 4 Driftseiningar med ymse husdyrslag etter buskapsstorleik. 1. januar