Potet- og grovfôravlingar, 1999, førebelse tal

Gode engavlingar

Samla avling frå eng til slått var om lag 2,7 millionar tonn rekna som tørt høy. Dette er om lag det same som i 1997 og 1998. Gjennomsnittleg avling er rekna til 555 kilo per dekar i 1999 mot 549 kilo i 1998. Dei gode avlingstala for eng kjem av ein kald og nedbørrik forsommar over størsteparten av landet, men nedbøren førte også til variabel kvalitet, særleg ved første slått. Nord-Noreg hadde ein kald vertype også i juli og august, noko som ga reduserte avlingar ved andre slått. Ein god første slått førte likevel til bra totalavling i Nord-Noreg.

Redusert potetareal

Total potetavling var 380 600 tonn i 1999 mot 434 900 tonn i 1998. Reduksjonen i total potetavling kjem i hovudsak av ein nedgang i potetarealet med 13 500 dekar til 148 600 dekar i 1999. Dei to siste åra har potetarealet gått ned med i alt 17 prosent. Gjennomsnittleg potetavling er rekna til 2 561 kilo per dekar i 1999 mot 2 684 kilo per dekar i 1998.

Kornavling

Samla kornavling var 1,30 millionar tonn i 1999 mot 1,38 millionar tonn i 1998. Gjennomsnittleg kornavling er rekna til 397 kilo per dekar i 1999 mot 405 kilo per dekar i 1998. Avling per dekar var i 1999 466 kilo for kveite, 357 kilo for bygg og 439 kilo for havre. For meir utførlege opplysningar om avling av korn og oljevekstar, sjå http://www.ssb.no/korn/ .

Grønfôr- og silovekstar

Det blei dyrka grønfôr- og silovekstar på 307 700 dekar i 1999, og det er 47 500 dekar mindre enn i 1998. Eittårig raigras blei dyrka på 175 300 dekar, med ei dekaravling på 2 917 kilo. Grønfôrblandingar og kornvekstar blei dyrka på 116 200 dekar, med ei avling på 1 834 kilo per dekar.

Tabeller:

• Tabell 1 Avling i jordbruket 1999. Einingar med minst 5 dekar jordbruksareal i drift. Førebels tal
• Tabell 2 Samla avling av ein del jordbruksvekstar. Einingar med minst 5 dekar jordbruksareal i drift
• Tabell 3 Avling per dekar for ein del jordbruksvekstar. Einingar med minst 5 dekar jordbruksareal i drift