21 tonn pukkellaks tatt i elvane

I alt vart det fiska og avliva 348 tonn laks, sjøaure, sjørøye, regnbogeaure og pukkellaks i dei norske elvane i 2019. Dette er ein auke på 13 prosent frå 2018. Noko av auken kjem av at pukkellaks først er rekna med frå 2019.

I tillegg vart 102 tonn laks, sjøaure og sjørøye sleppt levande ut i elva igjen, ein nedgang på knapt 4 prosent samanlikna med året før. I alt vart 1 av 5 fiskar sleppt levande ut i elva igjen. Det er førebels tal for elvefiske 2019 som viser dette. 

Namsenvassdraget på topp

Laksefiskarane i Namsenvassdraget drog på land ein samla fangst på 8 900 laks, sjøaure, sjørøye, regnbogeaure og pukkellaks i 2019, noko som er ein auke på 18 prosent frå året før.

8 prosent av fiskane vart sleppte levande ut igjen, medan 92 prosent vart avliva. Med dette var Namsenvassdraget laksefiskevassdraget med flest landingar i 2019.

Etter Namsen er det i Tanavassdraget det vart fiska mest. Det vart fiska 7 900 laks, sjøaure, sjørøye, regnbogeaure og pukkellaks i den norske delen av Tanavassdraget i 2019. Det er ein nedgang på 21 prosent frå året før. 98 prosent av fiskane vart avliva, og 2 prosent vart sleppte levande ut i elva igjen.

Størst del fang og slepp i Gaula og Orkla

Gaula og Orkla er dei største vassdraga når det gjeld fang og slepp.

I 2019 vart det fiska 3 900 laks, sjøaure, sjørøye, regnbogeaure og pukkellaks i Gaulavassdraget, og 65 prosent av desse vart sette ut igjen. Tilsvarande tal for Orkla var 3 700 fisk totalt, og av desse vart 60 prosent sette ut igjen.