1 av 4 elvefisk sleppte ut igjen etter fangst

I alt blei det fiska og avliva 354 tonn laks, sjøaure, sjørøye, regnbogeaure og pukkellaks i dei norske elvane i 2020. Dette er 1 prosent meir enn året før. I tillegg blei 128 tonn laks, sjøaure og sjørøye sleppt levande ut i elva igjen, ein auke på 21 prosent samanlikna med 2019. Det er førebels tal for elvefiske etter laks, sjøaure og sjørøye 2020 som viser dette.

Størst del fang og slepp i Gaula og Orkla

Gaula og Orkla er dei klart største vassdraga når det gjeld fang og slepp. Begge elvane hadde ein formidabel auke frå 2019 til 2020. Talet på fiskar som blei sleppte ut igjen i Gaulavassdraget auka med 76 prosent, til 4 500 fiskar i 2020. Det utgjorde 67 prosent av totalen i vassdraget. Orkla nær dobla talet på fisk som blei sett ut igjen, til 4 400 fiskar i 2020. Det utgjorde 64 prosent av total fangst i elva.

Namsenvassdraget på topp

Med ein samla fangst på 9 500 laks, sjøaure, sjørøye, regnbogeaure og pukkellaks, som er ein auke på 8 prosent frå året før, hadde Namsenvassdraget flest landingar i 2020. 5 prosent av fiskane blei sleppte levande ut igjen, medan 95 prosent blei avliva. Etter Namsen er det i Altavassdraget det vert fiska mest. Det blei fiska 7 300 laksefisk i 2020, som er ein auke på 38 prosent frå året før. Her blei 14 prosent av fiskane sleppte levande ut i elva igjen.

Nedgang på 30 prosent i Tana

Det blei fiska 5 500 laks, sjøaure, sjørøye, regnbogeaure og pukkellaks i den norske delen av Tanavassdraget i 2020. Det er ein nedgang på 30 prosent frå året før. 4 prosent av fiskane vart sleppte levande ut i elva igjen.

Variasjonar i fangstane frå år til år heng i hovudsak saman med kor mykje laks som går opp i elvane og fiskeforholda i elvane.