Elektrisitet, mars 2002

Bruttoforbruket av elkraft gjekk ned med 10,9 prosent i høve til same månaden i fjor, og ikkje sidan 1997 er det blitt brukt så lite elektrisitet for mars månad. Mykje av forklaringa ligg i det varme vêret, og mars i år var godt over normalen, medan månadstemperaturen var under normalen for mars i fjor. Elektrisitetsprisane var om lag dei same som på denne tida i fjor. Trenden har vore stigande prisar frå i fjor, og verknaden av dette kan ha slått ut også i mars. Lette fyringsoljer og fyringsparafin kan vera eit alternativ til elkraft, men salet av desse gjekk ned med høvesvis 21,0 og 25,3 prosent i forhold til mars i fjor. For siste tolvmånadersperioden gjekk forbruket av elkraft ned med 3,4 prosent. Forbruket av elkraft i kraftintensiv industri var 2 699 GWh i mars, og det er ein nedgang på 7,5 prosent i høve til tilsvarande månad i fjor.

Lågare produksjon

Produksjonen var 11 787 GWh i mars, og dette er ein nedgang på 1,3 prosent i høve til same månad i 2001. Som i fjor var det høgast produksjon i Nordland for denne månaden med 1 521 GWh. Til no i år er det blitt produsert 36 759 GWh, og det er 4,5 prosent lågare enn for tilsvarande periode i fjor. For same periode auka vindkraftproduksjonen med 78,8 prosent. Vindkraftproduksjonen er jamvel beskjeden i høve til vasskraftproduksjonen, og utgjorde for dei tre første månadene i år 0,03 prosent av den totale produksjonen av elkraft. Fyllingsgraden i vassmagasina var i gjennomsnitt 47,1 prosent av total magasinkapasitet i mars.

Eksportoverskot

Det vart eksportert 773 GWh og importert 606 GWh i mars månad. Det meste av handelen føregår med Sverige, men det vert også omsett kraft med Danmark, Finland og Russland. Eksportoverskotet sin del av den totale produksjonen var 1,4 prosent i mars, og 2,8 prosent for dei tre første månadene i året.

Tabeller:

• Tabell 1 Produksjon, import, eksport og forbruk av elektrisk kraft. GWh. Førebelse tal