Elektrisitet, juli 2000

For sjette månaden på rad har det vore rekordhøg produksjon av elektrisk kraft. Auka i elproduksjonen for dei fire fylka som produserer mest elkraft (Telemark, Hordaland, Sogn og Fjordane og Nordland), var 5,2 prosent samanlikna med juli i fjor. Produksjonen av elkraft i dei fire fylka utgjer om lag 47,9 prosent av total elproduksjon. Produksjonen av elektrisk kraft dei første sju månadene av året var i alt 83 558 GWh. Auken er på 19,6 prosent samanlikna med tilsvarande periode i 1999. Dei siste 12 månadene er det produsert 136 368 GWh. Dette er ein auke på 12,4 prosent samanlikna med tilsvarande 12-månadsperiode i fjor.

Fyllingsgrada i vassmagasina var i midten av juli, måndagen i veke 29, 86,8 prosent av total vassmagasinkapasitet. Det er 0,4 prosentpoeng høgare enn for tilsvarande veke i fjor, og er 8,3 prosentpoeng høgare enn medianen for veke 29 i perioden 1990-1999.

Forbruket av elektrisk kraft i juli var rekordhøgt med 8 123 GWh. Dette er ein auke på 7,0 prosent samanlikna med same månad i fjor og er 4,7 prosent høgare enn den tidlegare rekorden for månaden. Elforbruket i kraftintensiv industri var i juli 2 798 GWh. Hittil i år er forbruket av elektrisk kraft 73 194 GWh, som er ein auke på 3,7 prosent samanlikna med same periode i fjor. Forbruket av elkraft dei siste 12 månadene var 123 451 GWh.

Rekordhøgt eksportoverskot

Noreg eksporterte 2 020 GWh elektrisk kraft i juli, og dette er rekord for denne månaden. Med ein import av elkraft i juli som utgjorde 64 GWh og som låg på et middelnivå, ga dette eit rekordhøgt eksportoverskot på 1 956 GWh. Verdien av eksportoverskotet i juli er på 103,5 millioner kroner. Eksporten av elektrisk kraft er størst til Sverige med 1 520 GWh, medan eksporten av elkraft til Danmark var 500 GWh. Utvekslinga av elektrisk kraft for dei fyrste sju månadene i år viser eit eksportoverskot på 10 364 GWh, mot eit importoverskot på 742 GWh i tilsvarande periode i 1999.

Tabeller:

• Tabell 1 Produksjon, import, eksport og forbruk av elektrisk kraft. Gwh. Førebelse tal