Elektrisitet, januar 2000

Bruttoforbruket av elektrisk kraft i januar var det nest høgaste som er målt for denne månaden, 0,3 prosent lågare enn rekorden for denne månaden i 1996. Elforbruket dei siste 12 månadene var 121 001 GWh, ein auke på 83 GWh eller 0,1 prosent. Forbruket av elektrisk kraft i kraftintensiv industri var rekordhøgt i januar med 2 745 GWh, opp 35 GWh samanlikna med den tidlegare januarrekorden frå i fjor. Auken i forbruket var størst i produksjonen av kjemiske råvarer med 8,9 prosent jamført med same månad i 1999. Elforbruket i produksjonen av aluminium og andre metallar hadde ein auke på 1,4 prosent, medan det var ein nedgang i elforbruket i produksjonen av jern, stål og ferrolegeringar.

Eksporten av elektrisk kraft var i januar 807 GWh, medan importen var 227. Dette gjer eit eksportoverskot på 580 GWh, mot eit importoverskot på 670 GWh for same månad i fjor. Verdien av eksportoverskotet var 76,2 millionar kroner.

Høy elproduksjon og innhald i vassmagasina

Dei siste fem åra har veksten i produksjonen av elektrisk kraft i januar månad vore på gjennomsnittleg 3,1 prosent. Veksten i produksjonen frå januar i fjor til januar i år på 11,9 prosent var dermed klart høgare enn gjennomsnittet for perioden. Produksjonen av elektrisk kraft i januar på 13 295 GWh er det nest høgaste som er målt i denne månaden. Berre i 1996 var produksjonen høgare. Elproduksjonen dei siste 12 månadene var 124 061 GWh, ein auke på 5,9 prosent samanlikna med tilsvarande periode i fjor.

Innhaldet i vassmagasina var i midten av januar 74,6 prosent av total magasinkapasitet. Det er 7,9 prosentpoeng høgare enn for tilsvarande veke i fjor og 4,0 prosentpoeng høgare enn medianen på same tidspunkt (måndagen i veke 3) i åra 1982-1991.

Tabeller:

• Tabell 1 Produksjon, import, eksport og forbruk av elektrisk kraft. GWh. Førebels tal