Produksjonsvekst i industrien i 2. kvartal

Indeksnivået for industriproduksjonen var på 114,9 (2005=100) i 2. kvartal 2018 mot 114,0 i føregåande kvartal.

Tremånadersendring: auke i næringsmiddel- og drikkevareindustrien

Sesongjusterte tal viser at industriproduksjonen hadde ein auke på 0,8 prosent i 2. kvartal 2018 samanlikna med det føregåande kvartalet. Veksten kan særleg knytast til høg produksjon i næringsmiddel- og drikkevareindustrien. Oppgangen heng mellom anna saman med høg aktivitet innanfor produksjon av kjøtt- og kjøttvarer. I tillegg var det òg høg produksjon innanfor meierivarer og iskrem, og mineralvann og leskedrikker. Denne utviklinga kan sjåast i samanheng med høg temperatur og finvær.

Næringsgruppa oljeraffinering, kjemisk og farmasøytisk industri bidrog også til vekst frå 1. til 2. kvartal grunna høg produksjon av farmasøytiske produkt. På den andre sida, blei auka i den samla industriproduksjonen noko dempa av lågare produksjon innanfor næringar som gummi, plast og mineralsk industri og maskinreparasjon og -installasjon.

Månadsendring: uendra industriproduksjonen frå mai til juni

Sesongjusterte tal viser at den samla industriproduksjonen var uendra frå mai til juni 2018. Næringar innanfor den petroleumsretta leverandørindustrien som metallvareindustrien og bygging av skip og oljeplattformer såg ein oppgang i denne perioden. På den motsette sida fall produksjonen i mellom anna kjemiske råvarer, og i gummi, plast og mineralsk industri.

Klår auke i industriproduksjonen i eurosona i mai 2018

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein klår oppgang på 1,4 prosent frå april til mai 2018. I same periode gjekk produksjonen i Noreg ned med 0,6 prosent, viser sesongjusterte tal.

To av nabolanda våre, Sverige og Danmark, hadde ulik utvikling i industriproduksjonen frå april til mai 2018. Medan Sverige hadde ein oppgang på 1,8 prosent, hadde Danmark eit fall på 1,5 prosent.

Tremånadersendring: nedgang i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde eit fall på 1,1 prosent i 2. kvartal 2018 samanlikna med det føregåande kvartalet, viser sesongjusterte tal. Utvinning av råolje hadde ein nedgang på 4,8 prosent, medan utvinning av naturgass auka med 4,1 prosent. For fleire detaljar om olje- og gassproduksjonen i juni 2018 sjå pressemelding frå Oljedirektoratet.

Innanfor utvinningstenester var det ein tydeleg oppgang på heile 4,8 prosent i 2. kvartal 2018 samanlikna med føregåande kvartal. Den sterke veksten heng mellom anna saman med høg aktivitet knyta til samanstilling og montering av nye plattformar.

Bergverksdrift gjekk ned 2,2 prosent i den same perioden, medan produksjonen innanfor norsk kraftforsyning hadde eit kraftig fal på heile 12,9 prosent. Nedgangen i kraftforsyning skuldast mellom anna lite nedbør. For fleire detaljar om produksjonen i norsk kraftforsyning i 2. kvartal 2018 sjå pressmelding frå NVE.