Produksjonsfall i industrien i årets 1. kvartal

Indeksnivået for industriproduksjonen var på 113,8 (2005=100) i 1. kvartal 2018 mot 115,1 i føregåande kvartal. Glatta sesongjusterte tal viser ein fallande trend for dei siste tre månadene (sjå figur 1).

Tremånadersendring: vekst i leverandørindustrien, tydeleg fall i annan industri

Sesongjusterte tal viser at industriproduksjonen hadde ein nedgang på 1,1 prosent i 1. kvartal 2018 samanlikna med det føregåande kvartalet. Nedgangen kan særleg knytas til låg produksjon i næringsmiddelindustrien og innanfor næringsgruppa oljeraffinering, kjemisk og farmasøytisk industri.

På den motsette sida, bidrog bygging av skip og oljeplattformer til å dempe det samla fallet i industriproduksjonen. Næringa såg ein klår vekst på 6,4 prosent grunna høg aktivitet innan både skips- og plattformbygging. Den petroleumsretta leverandørindustrien hadde samla sett ein vekst på 1 prosent i 1. kvartal 2018 samanlikna med det føregåande kvartalet (sjå figur 3).

Månadsendring: flat utvikling frå februar til mars 2018

Sesongjusterte tal viser at industriproduksjonen var tilnærma uendra frå februar til mars 2018, med eit lite fall på 0,1 prosent. Leverandørnæringar som bygging av skip og oljeplattformer og maskinindustrien såg ein vekst i denne perioden. På den motsette sida fall produksjonen i næringsgruppa oljeraffinering, kjemisk og farmasøytisk industri, og i trelast- og trevareindustrien.

Tolvmånadersendring: produksjonsauke i eurosona, flat utvikling i Noreg i februar 2018

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein auke på 2,5 prosent frå februar 2017 til februar 2018. Kalenderjusterte tal viser at norsk industriproduksjon var tilnærma uendra i den same perioden, med ein marginal oppgang på 0,2 prosent. Bygging av skip og oljeplattformer hadde ein klår vekst, medan næringsgruppa oljeraffinering, kjemisk og farmasøytisk industri saman med næringsmiddelindustrien såg eit tydeleg fall.

Tremånadersendring: tydeleg vekst i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein auke på 2,7 prosent i 1. kvartal 2018 samanlikna med det føregåande kvartalet, viser sesongjusterte tal. Utvinning av råolje hadde ein klår oppgang på 3,1 prosent, medan utvinning av naturgas var tilnærma uendra. For fleire detaljar om olje- og gassproduksjonen i mars 2018 sjå pressemelding frå Oljedirektoratet.

Innanfor utvinningstenester var det ein nedgang på 1,1 prosent i 1. kvartal 2018 samanlikna med føregåande kvartal. Bergverksdrift hadde ein tydeleg vekst på 6,7 prosent i den same perioden, medan produksjonen innanfor norsk kraftforsyning gjekk opp 2 prosent.