Moderat vekst i industriproduksjonen

Indeksnivået for industriproduksjonen var på 115,9 (2005=100) i perioden juni-august 2018 mot 115,2 i den føregåande tremånadersperioden.

Tremånadersendring: høg produksjon av fisk og farmasøytiske produkt

Sesongjusterte tal viser at industriproduksjonen hadde ein marginal auke på 0,6 prosent i perioden juni-august 2018, samanlikna med tremånadersperioden før. Veksten kan særleg knytast til ein auke i næringsmiddel- og drikkevareindustrien og til næringsgruppa oljeraffinering, kjemisk og farmasøytisk industri. Produsentane av mat og drikke opplevde ein auke på 2,7 prosent, som mellom anna heng saman med høg produksjon innanfor foredling og konservering av fisk. Dessutan bidrog òg godt sommarvær til stor aktivitet innanfor meierivarer og iskrem, øl og malt i tillegg til mineralvann og leskedrikkar. For næringsgruppa oljeraffinering, kjemisk og farmasøytisk industri var høg produksjon av farmasøytiske produkt ei viktig årsak til veksten på 3,7 prosent.

På den motsette sida bidrog næringar innanfor petroleumsretta leverandørindustri, slik som maskindustrien og maskinreparasjon- og installasjon, til å dempe veksten i den samla industriproduksjonen. 

Månadsendring: uendra industriproduksjon frå juli til august

Sesongjusterte tal viser at den samla industriproduksjonen var tilnærma uendra frå juli til august 2018, med ein liten nedgang på 0,1 prosent. Dataindustri og elektrisk utstyrsindustri hadde ein tydeleg oppgang i denne perioden, medan næringsgruppa oljeraffinering, kjemisk og farmasøytisk industri opplevde eit klårt fal.

Nedgang i eurosona, mot oppgang i Noreg i juli

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein nedgang på 0,7 prosent frå juni til juli 2018. I same perioden auka produksjonen i Noreg med 1,0 prosent, viser sesongjusterte tal.

To av nabolanda våre, Sverige og Danmark, hadde ulik utvikling i industriproduksjonen frå juni til juli i år. Medan Sverige hadde ein klår nedgang på 2,3 prosent, hadde Danmark ein vekst på 1,4 prosent. 

Tremånadersendring: klår vekst i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein klår vekst på 2,9 prosent i perioden juni-august 2018 samanlikna med førre tremånadersperiode, viser sesongjusterte tal. Utvinning av råolje hadde ein solid oppgang på 7,0 prosent, medan utvinning av naturgass auka med heile 11,1 prosent. For fleire detaljar om olje- og gassproduksjonen i august 2018 sjå pressemelding frå Oljedirektoratet.

Innanfor utvinningstenester var det ein markert oppgang på 3,3 prosent i perioden juni-august 2018 samanlikna med den førre tremånadersperioden. Bergverksdrift og produksjonen innanfor kraftforsyning gjekk begge ned med 4,5 prosent i den same perioden.