Folkemengde og befolkningsendring, 3. kvartal 2012

Innvandringa held fram på det same høge nivået som dei to siste åra. Samanlikna med samsvarande kvartal i tidlegare år, har folkeveksten aldri vore så høg. Veksten er to til tre gongar så høg som i tida fram til og med 2006. Det blei født16 200 born, mens 9 800 personar døydde i 3. kvartal. Fødselsoverskotet på 6 400 personar held seg dermed like høgt som sidan 2008.

I samsvar med dei seinare åra auka folketalet mest i Oslo og Akershus, samt i Rogaland og Hordaland. Oppland hadde den minste veksten både i reine tal og i høve til folketalet.

Folketalet auka med 52 300 i dei tre første kvartala i år. Dette er om lag det same som i dei tre første kvartala førre året.

Oslo hadde høgast fødselsoverskot

I 3. kvartal er nok ein gong Oslo fylket med det høgaste fødselsoverskotet, også i høve til folketalet. Det blei født 2 700 born, medan 1 050 personar døydde. Hedmark og Oppland hadde det lågaste fødselsoverskotet, og samla blei det født berre 15 fleire enn det døydde i desse to fylka.

Flest polakkar, litauarar og svenskar innvandra

Mellom utalandske statsborgarar som har innvandra, var det framleis flest polakkar, litauarar og svenskar i 3. kvartal. Samstundes kom det dobbelt så mange statsborgarar frå Romania i 3. kvartal som i 2. kvartal 2012.

Svenske statsborgarar var klårt den største gruppa som utvandra frå Noreg, slik at dei enda opp med ei nettoinnvandring på berre 150. Nettoinnvandringa av polske og litauiske statsborgarar låg samla på 3 900 personar, noko som er meir enn ein firedel av den samla nettoinnvandringa. Nettoinnvandringa av 360 spanske statsborgarar gir dei ein samla tiandeplass.

Største nettoinnvandringa hadde Hordaland, tett føre Akershus og Sør-Trøndelag.

Ni fylka hadde innalandsk nettoinnflytting

Ni av fylka hadde innalandsk nettoinnflytting, medan ti hadde nettoutflytting. Største nettoinnflyttinga hadde Sør-Trøndelag med 700 personar, medan Akershus låg rett etter. Desse to fylka skilde seg ut. Det er særleg i innlandet, på Nordvestlandet og i Nord-Noreg, at det er nettoutflytting. I tillegg var det nettoutflytting i Rogaland. Størst innalandsk nettoutflytting hadde nok ein gong Nordland med 600 personar. I Nordland er samstundes nettoutflyttinga størst i høve til folketalet, saman med Sogn og Fjordane. Størst samla flytteaktivitet, inn i og ut av fylket, finn vi i Oslo. Minst 5 prosent av innbyggjarane kom anten til eller drog frå fylket i 3. kvartal.

Blomster, diplom og feiring

I Sør-Trøndelag blei det feira at dei runda 300 000 innbyggjarar i 3. kvartal. I Tromsø feira dei innbyggjar nummer 70 000, og i Lillesand at dei vart 10 000. Radøy vil feira at dei har runda 5 000 personar. Røyken og Finnøy såg ut til å runda høvesvis 20 000 og 3 000 innbyggjarar, men stoppa ørlite opp dei siste dagane slik at dei laut venta til litt inn i 4. kvartal.

Heile 216 kommunar har hatt eit fødselsoverskot til no i år. Ser ein det i høve til folketalet, er det særleg kommunane på Jæren og elles i Rogaland at overskotet er høgt. 200 kommunar hadde fødselsunderskot, og blant desse finn vi mellom andre fleire kommunar i Hedmark. I høve til folketalet er underskotet stort i fleire nordnorske kommunar. Folketalet auka i 301 kommunar, medan det gjekk ned i 120 kommunar. Med unntak av dei folkerikaste kommunane, var det nok ein gong Skedsmo som fekk størst vekst.

165 kommunar hadde ei innalandsk nettoinnflytting, mellom dei fleire kommunar i Akershus. Fredrikstad hadde største vinsten. Blant 257 kommunar med innalandsk nettoutflytting finn vi fleire kommunar i Nord-Noreg og Nordvestlandet, men Stavanger og Oslo skil seg klårt ut som dei med det største tapet. Den store nettoinnvandringa frå utlandet vog mykje opp for det innalandske flyttetapet i mange kommunar. Soleis fekk særleg Oslo, men og Stavanger, stor samla nettoinnflytting. Berre sju kommunar i landet hadde ei nettoutvandring til utlandet.

Tabeller

1. Dei 10 kommunane med størst og minst flyttevinst 1., 2. og 3. kvartal 2012

2. Dei 10 kommunane med størst og minst fødselsoverskott og folketilvekst 1., 2. og 3. kvartal 2012