Folkemengde og befolkningsendring, 3. kvartal 2011

Folketalet voks med 20 050 i tredje kvartal i år. Berre veksten på 20 200 i tredje kvartal i fjor, har vore større enn i år. I åra fram mot 2004 voks folketalet med 7 000-8 000 i same kvartal, så veksten dei siste par åra har vori opptil tre gonger så høg som då. Det var berre små endringar i år frå same kvartal i fjor; litt fleire både av inn- og utvandringar, det vart født litt færre og litt fleire døydde.

Framleis stor polsk og baltisk innvandring - men ikkje svensk

Polakkane var den klart største gruppa av utalandske statsborgarar som innvandra, med 3 150 flyttingar til Noreg. Det er 300 fleire samanlikna med førre året. På grunn av at 200 færre polakkar flytta ut av landet i år enn i fjor, steig nettoinnvandringa frå 2 250 til 2 750. Ser ein på innvandringa frå Estland, Latvia og Litauen samla, var ho på 2 800 i år. Sidan berre 100 utvandra, var nettoinnvandringa på 2 700, noko som er 250 høgare enn førre året. Nettoinnvandringa frå Polen og Baltikum var i alt dermed på 5 450, eller 39 prosent, av den samla nettoinnvandringa. For svenskane var utviklinga motsett; det var 1 850 som innvandra, 300 færre i høve til førre året. Det var 1 700 svenskar som flytta frå landet, 300 fleire samanlikna med i fjor. I alt var nettoinnvandringa av svenskar dermed berre om lag 150, medan ho var 750 førre året. Filippinarane er no den tredje største gruppa når det gjeld nettoinnvandring, 800 flytta inn og 200 ut i tredje kvartal.

Framleis mange fødde

Talet på fødde minka med 100 i tredje kvartal i høve til tredje kvartal i fjor. I fjor minka det med 100 mot året før det igjen, men det ligg framleis på eit høgt nivå med over 16 000. Dette er mellom 1 000 og 1 500 høgare enn det var fram mot år 2005. Oslo hadde det største fødselsoverskotet av fylka i tredje kvartal med 1 650, medan både Akershus, Rogaland og Hordaland hadde om lag helvta av det. Hedmark var det einaste fylket i landet med fødselsunderskot.

Talet på døde har vore stabilt dei seinare åra, og sjølv om det døydde 200 fleire i tredje kvartal i år enn i fjor - 10 000 mot 9 800 - var talet høgare i åra fram til og med 2003.

Størst flytteoverskot i Oslo

Ser ein på alle flyttingar under eitt, er det fire fylke som har stor nettoinnflytting - Oslo, Akershus, Hordaland og Sør-Trøndelag. På grunn av skilnader i fødselsoverskotet i fylka, står nettoinnflyttinga for meir enn 80 prosent av folkeveksten i Sør-Trøndelag, medan ho berre står for snautt helvta i Rogaland. Berre Nordland av alle fylka hadde ei samla nettoutflytting i tredje kvartal.

Når det gjeld innvandring, er det to område som dominerer biletet. Til Oslo og Akershus innvandra i alt 8 000 i tredje kvartal (5 200 til Oslo og 2 800 til Akershus), medan 4 600 innvandra til Rogaland og og Hordaland (om lag 2 300 kvar seg). Nettoinnvandringa - når ein har trekt frå utvandringa - er størst i Oslo med sine 2 300, føre Akershus og Hordaland. Alle fylka har nettoinnvandring frå utlandet, og sett i høve til folketalet er det ikkje i Oslo ho er størst, men det er Sør-Trøndelag som hårfint ligg på fyrsteplassen.

Oslo har òg størst innalandsk tilflytting med over 10 000, men fordi om lag like mange flyttar ut er nettoinnflyttinga frå andre fylke i landet berre 200. I alt ni fylke har innalandsk nettoinnflytting, størst i Akershus med 700. Størst i høve til folketalet er ho i østfold og Sør-Trøndelag. I alt ti fylke såg ei nettoutflytting til dei andre fylka, størst i Nordland med 550, men i høve til folketalet var ho størst i Finnmark. Det er to område som har ei stor innalandsk nettoutflytting; Nord-Noreg med 1 100 og Sogn og Fjordane/Møre og Romsdal med 500. Trøndelag har derimot ei nettoinnflytting på 500.

Folketalet har vaksi i dei fleste kommunane

Folketalet har vaksi i 309 av de 430 kommunane i landet dei tre fyrste kvartala i år, medan talet har gått ned i 112 kommunar. Når det gjeld fødselsoverskotet, er det som venteleg kommunane med dei største byane som har dei største overskota i absolutte tal. Men relativt sett er fødselsoverskotet høgast i rogalandskommunane og på Vestlandet elles. Seks av dei ti kommunane med relativt sett høgast overskot ligg i Rogaland. Blant kommunane med størst underskot finn vi fleire hedmarkskommunar, og mellom dei byane Hamar og Kongsvinger. Sett i høve til folketalet er underskotet stort i mange kommunar i Nord-Noreg, men òg i Hordaland.

Når det gjeld flytting, hadde mest alle kommunane ein flyttevinst frå utlandet. Det var berre åtte kommunar som hadde eit flyttetap til utlandet. Fjaler kommune står i ei særstilling, fordi ein vidaregåande skule der har elevar frå heile verda, og desse melder inn- og utvandring i samband med skulegangen. Den innalandske flyttevinsten er ikkje så stor sjølv i dei største kommunane, men med unntak av byane er det Eidsvoll og Ullensaker, som har størst vinst. Innalandsk flyttetap er stort i mange kommunar i Nord-Noreg, men dei tre kommunane med størst tap er Stavanger, Bergen og Tromsø.

Tabeller:

 Eldre tabeller