Folkemengde og befolkningsendring, 2. kvartal 2011

Folketilveksten var om lag 1 000 høgare i 2. kvartal enn tilveksten i same kvartal i fjor. Det har si årsak i at nettoinnvandringa no var 1 000 høgare enn i april - juni i 2010. Nettoinnvandringa stod for nær to tredelar av folketilveksten, medan fødselsoverskotet stod for resten. Talet på fødde og døde er omtrent uendra, og fødselsoverskotet for 2. kvartal ligg dermed omtrent på same nivå som i fjor.

Talet innvandringar var 16 400, som er 1 150 fleire enn i april - juni i fjor. Det var òg 900 fleire enn det var i 2008, som fram til då hadde rekordhøg innvandring. 6 600 utvandringar var om lag på same nivå som i 2010.

Samla folketilvekst i 1. halvår, med 32 700 fleire busette, blei grunna stor vekst i både 1. og 2. kvartal høgare enn noko gong tidlegare.

Størst fødselsoverskot i Oslo

Det blei født 2 700 born i Oslo i 2. kvartal. Med 1 650 fleire fødde enn døde har Oslo størst fødselsoverskot av fylka her i landet. Også sett i høve til folketalet hadde Oslo høgast fødselsoverskot, med 2,7 per 1 000 innbyggjar. Etter Oslo følgde Rogaland med 2,1. Det blei født fleire enn det døydde i alle fylka med unntak av Hedmark.

Mange innvandra - flest polakkar

Det innvandra 2 900 polske statsborgarar til Noreg i 2. kvartal, medan 460 utvandra. Dette gav ei høg nettoinnvandring på 2 400, som er vel 800 høgare enn førre året.

Dei andre gruppene av utanlandske statsborgarar med størst nettoinnvandring i 2. kvartal var dei med litauiske, eritreiske og latviske statsborgarskap, høvesvis 1 700, 400 og 400.

Størst flytteoverskot ovafor utlandet hadde Oslo og Akershus i 2. kvartal med høvesvis 1 350 og 1 200 fleire innvandringar enn utvandringar. Sett i høve til folketalet var det Møre og Romsdal som hadde størst overskot med 660 fleire inn - enn utvandringar. Alle fylka hadde flytteoverskot overfor utlandet.

Det samla innflyttingsoverskotet frå utlandet på heile 23 200 stod for 71 prosent av folketilveksten i 1. halvår.

Størst innalands flyttevinst for Akershus og østfold

åtte fylke hadde flyttevinst overfor resten av fylka i landet i 2. kvartal 2011. Høgast var dette overskotet i Akershus med 700 og i østfold med 500. Av dei elleve fylka som hadde innalandsk flyttetap var tapet høgast i Oslo med 700, og deretter i Sør-Trøndelag med 400.