Folkemengde og befolkningsendring, 3. kvartal 2008

Folketalet 1. oktober i år var 4 787 000. Folketilveksten på 17 900 er den høgaste som er registrert i eit 3. kvartal, og var 900 høgare enn i 2007.

19 150¹ personar flytta til Noreg og 7 300 flytta frå Noreg i denne perioden, noko som gav ei nettoinnvandring på 11 850¹ personar. I tredje kvartal førre året var nettoinnvandringa 11 600, medan ho i tidlegare år var opp mot 6 000 på sitt høgaste.

Polske statsborgarar held fram med å kome til Noreg

Av dei 16 300 personane utan norsk statsborgarskap som flytta til landet i tredje kvartal, utgjorde europeiske statsborgarar 67 prosent. Framleis var det klårt flest polske statsborgarar som kom til Noreg. Det var 3 450 polske statsborgarar som flytta til Noreg, og 420 som flytta frå Noreg i 3. kvartal.

Førre året kom det 3 850 polske statsborgarar til landet i same kvartal, medan 300 flytta ut. Nettoinnvandringa av polakkar gjekk difor ned med 500 frå førre året. Medan det kom færre polske statsborgarar til landet i tredje kvartal enn det som var snittet for dei to fyrste kvartala i år, var det fleire svenske og tyske statsborgarar som kom enn det som var snittet for dei to fyrste kvartala.

Mange fødde

Det vart født 15 900 born i 3. kvartal, noko som er 600 fleire enn i same kvartal i fjor. Ein må mange år attende for å finna tilsvarande høge tal.

9 800 personar døydde, snaue 100 færre i høve til same periode i fjor. Fødselsoverskottet på 6 100 er 12 prosent høgare enn i same kvartal førre året. Berre to av fylka hadde eit fødselsunderskott i tredje kvartal, Hedmark og Oppland . Størst var fødselsoverskottet i Oslo, med 1 500 personar.

I dei tre fyrste kvartala i 2008 vart det født 46 550 born, medan talet på døydde var 30 900. Fødselsoverskottet er dermed på 15 650, 16 prosent høgare enn til same tid i fjor.

Størst folketilvekst i sentrale strok

40 prosent av folketilveksten i tredje kvartal kom i Akershus og Oslo, og 23 prosent i Rogaland og Hordaland. I Sogn og Fjordane, Nordland og Finnmark gjekk folketalet ned, på grunn av innanlandsk flyttetap.

Ni fylke med innanlandsk flyttetap i tredje kvartal

Alle fylka i landet hadde eit innflyttingsoverskott frå utlandet, høgast i Oslo med 3 100. Ti fylke hadde innanlandsk flytteoverskott, høgast i Akershus med 650. Ni fylke hadde innanlandsk flyttetap, høgast i Nordland med 600. Sett i høve til folketalet hadde Finnmark det største innanlandske flyttetapet. Oslo hadde óg eit innanlandsk flyttetap, med 70.

Ser ein på dei tre fyrste kvartala av 2008, hadde Oslo det høgaste innflyttingsoverskottet frå utlandet med 8 600. Ti fylke hadde innanlandsk flytteoverskott, høgast i Akershus med 1 800. Ni fylke hadde innanlandsk flyttetap, høgast i Nordland med 1 150.

Folketalet auka i 263 kommunar i dei tre fyrste kvartala

Folketalet auka i 263 av landets kommunar i dei tre fyrste kvartala, medan det gjekk ned i 163 kommunar. Sett bort frå dei fire største byane hadde Bærum den største auken i folketalet. Folketalet i denne kommunen auka med 1 300. Sett i høve til folketalet var det likevel i Flå (Buskerud) at folketalet auka mest. Største tapet hadde Målselv (Troms) med 140, men i høve til folketalet var det Kvalsund (Finnmark) som hadde største tapet. Som i tidlegare år er det i dei sentrale kommunane at folketalet aukar, medan dei mindre sentrale stroka gjerne har både flyttetap og fødselsunderskott. Trondheim og Ullensaker (Akershus) hadde største innanlandske flyttevinsten med 600 kvar seg, medan Stavanger hadde største innanlandske flyttetapet med 400.

Bergen feira i 3. kvartal at dei såg innbyggjar nummer 250 000, og likeins gjorde dei i Grimstad med nummer 20 000. I fjerde kvartal vil venteleg Kristiansand runda 80 000, og dei 14 kommunane på Romerike 250 000.

Fødselsunderskott i mange innlandskommunar i dei tre fyrste kvartala

I alt 226 av kommunane hadde eit fødselsoverskott, medan 190 hadde eit fødselsunderskott. Største fødselsunderskottet hadde Eidskog (Hedmark) med 40. Fem av dei ti kommunane med størst fødselsunderskott var i Sør-Hedmark og ni av dei ti kommunane med størst fødselsunderskott var i Hedmark og Oppland.