Kommunestyre- og fylkestingsvalget, personer med stemmerett, 2007, foreløpige tall

Ikring 280 000 personar med innvandrarbakgrunn har røysterett ved valet til hausten, ein auke på 51 000 personar samanlikna med valet i 2003. I alt utgjer personar med innvandrarbakgrunn 7,7 prosent av dei røysteføre ved valet. 137 000 av desse er utanlandske statsborgarar med 3-årig butid eller meir, medan 142 000 er norske statsborgarar med innvandrarbakgrunn. Flest med innvandrarbakgrunn finn me i Oslo. Hjå norske statsborgarar med innvandrarbakgrunn finn me flest med ikkje-vestlig bakgrunn (heile 87 prosent), medan mellom utanlandske statsborgarar med røysterett finn me flest med vestleg bakgrunn (58 prosent).

Av einskildland finn me flest røysteføre frå Sverige og Danmark. Deretter fylgjer Pakistan og Vietnam. Samanlikna med valet i 2003 har det vore størst auke i talet på røysteføre med bakgrunn frå Somalia, som har auka med vel 3 900 personar. 32 prosent av dei røysteføre med innvandrarbakgrunn er busett i Oslo, mot 12 prosent av alle røysteføre i Noreg.

Fleire har røysterett

I alt har vel 3 610 000 personar røysterett ved kommunestyre- og fylkestingsvalet til hausten, ein auke på 100 000 røysteføre sida førre kommunestyre- og fylkestingsval. I høve til førre lokalval i 2003 har det vore ein auke i tala på røysteføre i nær alle fylke, berre i Sogn og Fjordane har det vore ein mindre reduksjon. I Oslo har det vore ein vekst på 4,9 prosent, medan tala for Akershus og Rogaland er på høvesvis 4,8 og 5 prosent.

Samanlikna med stortingsvalet i 2005 vil det vera om lag 190 000 fleire røysteføre ved kommunestyre- og fylkestingsvalet til hausten.

Auke i talet på fyrstegongsveljarar

Samanlikna med valet i 2003 så har 21 000 fleire 18-21-åringar røysterett ved lokalvalet for fyrste gong, samstundes som det har blitt fleire eldre røysteføre. Mengda eldre veljarar, 67 år og eldre, har auka med 14 000 samanlikna med 2003.

Norske statsborgarar busett i utlandet vert automatisk oppførte i manntalet dersom dei har vore busett i Noreg i dei ti siste åra, og elles fylgjer krava til røysterett. I år vil denne gruppa utgjere 42 000 personar.

Tabeller:

• Tabell 1 Kommunestyre- og fylkestingsvalet 2007. Utrekna tal for personar med røysterett. Fylke. Rekna ut i februar 2007 (Rettet 27. mars 2007)
• Tabell 2 Kommunestyre- og fylkestingsvalet. Utrekna tal for røysteføre utanlandske statsborgarar 1995-2007 og norske statsborgarar med innvandrarbakgrunn 2003-2007. Rekna ut i februar 2007 (Rettet 27. mars 2007)
• Tabell 3 Kommunestyre- og fylkestingsvalet 2007. Utrekna tal for røysteføre utanlandske statsborgarar. Fylke. Rekna ut i februar 2007
• Tabell 4 Kommunestyre- og fylkestingsvalet 2007. Utrekna tal for røysteføre utanlandske statsborgarar. Utvalde kommunar. Rekna ut i februar 2007
• Tabell 5 Kommunestyre- og fylkestingsvalet 2007. Utrekna tal for røysteføre norske statsborgarar med innvandrarbakgrunn. Fylke. Rekna ut i februar 2007
• Tabell 6 Kommunestyre- og fylkestingsvalet 2007. Utrekna tal for røysteføre norske statsborgarar med innvandrarbakgrunn. Utvalde kommunar. Rekna ut i february 2007