84949_not-searchable
/priser-og-prisindekser/statistikker/pppvare/arkiv
84949
Sveits og Noreg dyrast i Europa
statistikk
2012-06-25T10:00:00.000Z
Priser og prisindekser
no
pppvare, Prisnivå på varer og tjenester, prisnivåindeks, EU-land, EØS-land, internasjonale sammenligningerKonsumpriser, Priser og prisindekser
false

Prisnivå på varer og tjenester, 2011

Innhold

Publisert:

Du er inne i en arkivert publisering.

Gå til nyeste publisering

Sveits og Noreg dyrast i Europa

I ei prisnivåundersøking nyleg publisert av Eurostat, kjem Sveits og Noreg ut som Europas to dyraste land. Prisnivået i dei to EFTA-landa var meir enn 50 prosent høgare enn det gjennomsnittlege prisnivået i EU.

Prisnivå på konsumvarer og tenester 2011, totalindeks. EU27=100

Den europeiske kjøpekraftsundersøkinga måler det relative prisnivået mellom landa i Europa. Sveits og Noreg hadde dei høgaste prisnivåa på totalnivå, respektive 62 og 51 prosent over gjennomsnittet av prisnivået i dei 27 EU-landa (EU27). Eit stykke på veg kjem dette av sterk valuta mot euro i båe landa, noko som ”gjer desse landa dyrare” sett frå utlandet. Danmarks prisnivå var 6 prosent lågare enn det norske, medan Sverige og Finland hadde eit prisnivå omkring 16 prosent lågare enn det norske. Makedonia, Albania og Bulgaria var dei relativt sett billigaste landa i Europa. I desse landa er det generelle prisnivået på omkring ein tredel av det norske.

Prisnivåindeksar 2011 for utvalde vare-/tenestegrupper og land. EU27=100.
 
  Matvarer og
alkoholfrie
drikkevarer		 Alkoholhaldige
drikkevarer
og tobakk		 Klede Skotøy Hotell- og
restauranttenester
 
Noreg  164  250  134  141  184
Sveits  156  124  138  138  157
Danmark  136  125  119  113  154
Sverige  120  145  133  127  147
Italia  106  103 99  112  108
Storbritannia  103  147 97 82  105
Frankrike  108  109  104 98  104
Tyskland  110 97  103  105  103
Hellas  103 92  103  108 98
Spania 93 83 88  102 94
Tyrkia 80 92 65 65 71
 
Kjelde:  Eurostat.

Noreg dyrast for dei fleste typar varer og tenester

Noreg kjem ut som det dyraste landet i Europa i fleire produktgrupper i undersøkinga. Det norske prisnivået for alkoholhaldige drikkevarer og tobakk var to og ein halv gonger høgare enn gjennomsnittet av EU27. For hotell- og restauranttenester var det norske prisnivået 84 prosent høgare, medan for matvarer og alkoholfrie drikkevarer var prisnivået i Noreg 64 prosent over gjennomsnittet i EU27. Dei norske prisane på klede og sko var i 2011 respektive 34 og 41 prosent høgare enn i EU27.

Balkanland billigast på hotell- og restauranttenester

Makedonia, Albania og Bulgaria hadde Europas lågaste prisar på hotell- og restauranttenester i 2011. Prisnivået på desse tenestene i landa vest på Balkan er på under ein firedel av nivået i Noreg. Blant dei ferielanda som er dei mest populære hos nordmenn, har Tyrkia det mest behagelege prisnivået, omkring 60 prosent lågare enn det norske. Spania og Hellas har eit prisnivå som er drygt halvparten av det norske, medan prisnivået i Tyskland, Frankrike, Storbritannia og Italia er omkring 40 prosent lågare. Hotell- og restaurantprisane i Sverige og Danmark er omkring 20 prosent lågare enn i Noreg.

Størst variasjon i prisar for alkoholhaldige drikkevarer og tobakk

Som ein del av resultata i undersøkinga ser vi òg nærare på variasjonen i prisnivåa landa i mellom (variasjonskoeffisienten). Alkoholhaldige drikkevarer og tobakk er gruppa med dei største prisnivåskilnadene. Dei store skilnadene kjem først og fremst av ulikskap i avgiftsnivå mellom dei europeiske landa. Hotell- og restauranttenester har òg stor variasjon. Ein årsak til dette er at prisnivået på tenester ofte er nært knytt til dei svært ulike lønnsnivåa i landa.

Undersøkinga dekte meir enn 2 400 konsumvarer og tenester.

 

Totalt deltok 37 land i undersøkinga:

Dei 27 EU-landa.

Tiltredande EU-land Kroatia.

Dei fire kandidatlanda til EU1: Montenegro, Makedonia, Serbia og Tyrkia

Dei tre EFTA-landa: Noreg, Island og Sveits

To andre europeiske statar: Albania, Bosnia-Hercegovina.

Kva fortel tala?

Resultata av undersøkinga er uttrykt i prisnivåindeksar, som syner korleis prisnivået i eit land er i forhold til gjennomsnittet av dei 27 EU-landa (EU27=100). Om til dømes indeksen for prisnivået i eit land er 120, tyder dette at prisnivået i landet er 20 prosent høgare enn gjennomsnittet av dei 27 EU-landa. Endringar i valutakurs verkar inn på prisnivået frå år til år.

Prisnivåindeksane syner berre relative skilnader i prisnivå mellom land. Resultata fortel ikkje noko om den faktiske kjøpekrafta som ei gjennomsnittleg inntekt i kvart land eventuelt har.

Prisnivåindeksane på totalnivå inkluderer fleire varegrupper enn det som er omtalt i denne artikkelen ( sjå Eurostats database ). For fleire av desse vare/tenestegruppene har Sveits eit høgare prisnivå enn Noreg. Dette er årsaka til at Sveits kommer ut som det dyraste landet på totalnivå.2


Les meir i Eurostats artikkel ”Statistics in Focus” .


1  Rettet 26. juni 2012
   

Tabeller: