Produsentprisindeksen, 15. juli 2007

Fleire av underindeksane for industrigrupper gjekk ned frå juni til juli og førte til eit fall på 1,0 prosent i industriindeksen. Men med ein auke i oljeprisen på 5,6 prosent (Brent Blend, i norske kroner) steig indeksen for råolje og naturgass med 3,3 prosent. Dermed gjekk den totale produsentprisindeksen opp 0,4 prosent.

Fallet i industriindeksen kan i stor grad tilskrivast endringar i indeksane for raffinerte oljeprodukt og metall, sjølv om nokre andre underindeksar også gjekk ned. Metallindeksen auka kraftig i fjor og tidleg i år. Men etter ein topp i vårmånadene har den no gått ned to månader på rad. Endringa frå juni til juli var på -4,9 prosent. Prisane på nikkel på London Metal Exchange gjekk ned med heile 27,5 prosent, og prisane på aluminium fell også.

Etter ein våt sommar er fyllingsgraden i vassmagasina høgare enn normalt på denne tida av året. Dette har medverka til auka straumproduksjon og lågare prisar. Indeksen for elektrisitet gjekk ned 26,4 prosent frå juni til juli.

Indeksen for næringsmiddel og drikkevarar var så å seie uendra frå juni til juli. Prisane på trelast og varar av tre auka relativt kraftig i ein periode, men har nå vore ganske stabile i nokre månader. Prisindeksen for desse varane gjekk opp med 0,3 prosent.

Årsnedgang på 4,2 prosent

Den totale produsentprisindeksen var 4,2 prosent lågare i juli enn i den same månaden i fjor. Det er energiprisane som er den viktigaste årsaka til fallet i indeksen. Indeksen for råolje og naturgass har gått ned 7,0 prosent, medan elektrisitetsindeksen har stupt heile 59,7 prosent på eitt år.

Etter den siste månadens fall i prisane var metallindeksen 8,4 prosent lågare i juli i år enn i fjor. Det er den lågaste tolvmånadersendringa for denne underindeksen sidan november 2005. Perioden med høg prisstigning på trelast og trevarer har gjort seg synleg i denne indeksen sidan juli i fjor, med ein oppgang på 18,1 prosent.