Omsetning i olje og gass, industri, bergverk og kraftforsyning, juli 2003

Omsetninga frå norsk olje- og gassutvinning var i juli 2003 nesten 9 prosent lågare enn i same periode i fjor. Dette heng saman med ein noko lågare oljeproduksjon i juli i år enn på same tid i fjor.

Nedgang for investeringsvarer

Næringar som produserer investeringsvarer (transportmiddelindustrien, maskinindustrien og metallvareindustrien m.m.) har hatt ein nedgang i omsetninga på 5 prosent frå mai til juli - samanlikna med same periode i 2002. Nedgangen var generell og berre maskinindustrien skil seg ut med ein auke.

Innsatsvarer ned 2,4 prosent

Omsetninga av innsatsvarer fall med 2,4 prosent i perioden mai til juli samanlikna med same periode i fjor. Dette heng mellom anna saman med at omsetninga av kjemiske råvarer har hatt ein nedgang på om lag 7 prosent. Treforedling og metallindustrien hadde også fall i omsetninga med høvesvis 5,9 og 2,6 prosent.

Konsumvarer ned 1,5 prosent

Konsumvarer (næringsmiddelindustrien, tekstil- og kledningsindustrien, forlag og grafisk industri m.m.) har hatt 1,5 prosent lågare omsetning i perioden mai til juli samanlikna med same periode i 2002. Nedgangen er noko svakare for konsumvarer enn for dei andre varetypane. Nærings- og nytelsesmiddelindustrien hadde ei betring i omsetninga i juli i år, og dette har i stor grad dempa den samla nedgangen innanfor konsumvarer.

Endringstal og kraftforsyning

Finansielle kontraktar har verka inn på omsetningstal frå kraftforsyninga og tala frå denne næringa bør difor tolkast med varsemd.