Berekna folkemengd ved årsskiftet, 1. januar 2008

Ein tredel av folketilveksten vil kome på grunn av fødselsoverskott, medan to tredelar har si årsak i innflyttingsoverskott frå utlandet. Til samanlikning utgjorde fødselsoverskottet i 2006 42 prosent av folketilveksten, medan innflyttingsoverskottet frå utlandet då utgjorde 58 prosent. Det store innflyttingsoverskottet kjem i stor grad av arbeidsinnvandring. Særleg frå dei nye EU-landa i Aust-Europa - Polen og Litauen - men òg frå land som Tyskland og Nederland har nettoinnvandringa auka mykje. Folketilveksten i dei store byane held òg fram. Oslo veks med 11 500, noko som er 1 300 fleire enn førre året. Trondheim veks med 3 500, 500 fleire enn i fjor. Bergen vil vekse med 3 500, noko som er 1 000 fleire enn i 2006. Store kommunar på Austlandet som Bærum og Skedsmo vil òg vekse meir enn førre året, med om lag 1 500. Drammen vil vekse med 1 500, mot 1 000 i fjor.

Berekningane er laga for heile landet, fylka og kommunane. Folketala er berekna ut frå dei folkeregisteropplysningane om fødde, daude, inn- og utflyttingar som var komne inn fram til 1. desember 2007. Folketilveksten for desember i år er sett lik som han var i desember 2006. Dersom mønsteret for flyttingar, fødslar og dødsfall endrar seg mykje i desember i år samanlikna med desember i fjor, vil folketalet endre seg i takt med desse nye meldingane.

For nokre kommunar vil det sjå ut som ei utvikling er broten, men dette har si årsak i berekningsmetoden. Dette vil særleg gjere seg gjeldande for små kommunar, og ein lyt difor sjå på tala særleg for slike kommunar som ei førebels berekning.