Ekteskap og skilsmisser, 2003

Talet på skilsmål per 1 000 gifte og separerte har meir enn firedobla seg sidan byrjinga på 1960-talet. Separasjonsraten derimot, som er separasjonar sett i høve til talet på 1 000 gifte, gjekk ned frå 15,6 til 15,3 frå 2002 til 2003.

Skilsmålsraten høgast i aldersgruppa 35-39 år

Både for menn og kvinner var skilsmålsraten høgast i aldersgruppa 35-39 år med høvesvis 22,8 og 23,6 skilsmål per 1 000 gifte og separerte. Det var òg i denne aldersgruppa at raten auka mest for kvinner. For menn auka raten mest i aldersgruppa 25-29 år. For kvinner auka den i alle aldersgrupper, unnateke aldersgruppa 30-34 år. For menn og kvinner over 69 år var skilsmålsraten låg, med mindre enn ein av 1 000 gifte og separerte, og dei to siste åra har det heller ikkje vore noka endring.

11 400 barn opplevde skilsmål

For heile landet var det 11 av 1 000 barn av gifte foreldre som opplevde at foreldra skilde lag i 2003. Det var flest barn i Buskerud og Vestfold som opplevde skilsmål, med 13 barn av 1 000 i kvart fylke. Færrast var det i Sogn og Fjordane med om lag sju av 1 000.

41 prosent av dei som skilde seg i fjor hadde ikkje felles barn, 23 prosent hadde eitt barn, 27 prosent hadde to barn og 9 prosent hadde tre eller fleire barn.

Det eksisterer ingen årleg statistikk over brotne sambuarskap.

45 prosent av ekteskapa kan ryke før sølvbryllaupet

Etter tre, fem og 25 års ekteskap kan i tur og orden 5, 11 og 45 prosent av ekteskapa enda i skilsmål ifølgje utrekningar grunna i skilsmåla for 2003.

Oppløyste partnarskap

Hjå registrerte partnarar, der eldste partnar var busett i Noreg, vart 50 par skilde og 48 par separerte i 2003. Tilsvarande tal for 2002 var 44 skilde og 71 separerte par. Per 1. januar i år var det 2 600 personar som var registrerte partnarar her i landet. Lova om registrerte partnarskap vart innført i 1993.

Tabeller:

• Tabell 1 Oppløyste ekteskap. Separasjonar. 1961-2003
• Tabell 2 Skilsmål og separasjonar, etter fylke. 1981-2003
• Tabell 3 Skilsmålsrater for menn og kvinner i ulike aldersgrupper. 1959-2003
• Tabell 4 Skilsmål, etter talet på år ekteskapet har vara. 1971-2003
• Tabell 5 Skilsmål, etter talet på felles barn. 1971-2003
• Tabell 6 Talet på barn som opplevde skilsmål. 1971-2003
• Tabell 7 Skilsmål, etter talet på barn og talet på år ekteskapet har vara. 2003
• Tabell 8 Berekna prosent ekteskap som vil bli oppløyst, såframt skilsmålsrater som i det einskilde år. 1960-2003
• Tabell 9 Barn under 18 år som har opplevd skilsmål, ettter fylke. 2003
• Tabell 10 Separasjonsrater for menn og kvinner i ulike aldersgrupper. 1999-2003
• Tabell 11 Separasjonar, etter talet på år ekteskapet har vara. 2000-2003
• Tabell 12 Separasjonar, etter talet på felles barn. 1999-2003
• Tabell 13 Talet på barn som opplevde separasjon. 1999-2003
• Tabell 14 Separasjonar, etter talet på barn og talet på år ekteskapet har vara. 2003